Шри Ланкад сүүлийн хэдэн арван жилд тохиож байгаагүй эдийн засгийн хямрал үүссэний улмаас иргэд өргөн хүрээний эсэргүүцлийн жагсаал зохион байгуулсны дараа тус улсын Засгийн газрын сайд нар олноороо огцорчээ.

Нийт 26 сайд бүгд огцрох өргөдлөө өгсөн бол Ерөнхий сайд Махинда Ражапакса болон түүний дүү, Ерөнхийлөгч Готабая Ражапакса нар огцроогүй аж.

Тус улс 1948 онд Их Британиас тусгаар тогтносноос хойш хамгийн ноцтой эдийн засгийн хямралтай тулгараад байгаа ба гадаад валютын хомстолын улмаас шатахууны импортын төлбөрөө төлөх боломжгүй болсон юм. Мөн тог цахилгаан өдрийн ихэнх үед тасарч, хоол хүнс, эм тариа, түлш шатахууны хомстолд орсноор иргэдийн уур бухимдал дээд цэгтээ хүрэн, хэд хэдэн хотод олноороо жагсаж, хөл хориог зөрчсөн билээ.

Боловсролын сайд Динеш Гунаварденагийн хэлснээр, сайд нар огцрох өргөдлөө өнгөрөгч ням гарагт хүргүүлсэн бөгөөд ингэснээр Ерөнхийлөгч болон Ерөнхий сайд ард түмний дунд болон Засгийн газарт тогтвортой байдлыг бий болгоход тусална гэж найдаж байгаа аж. Огцорсон сайд нарын дунд Ерөнхий сайдын төрсөн хүү Намал Ражапакса ч байгаа юм.

Өнгөрөгч ням гарагт олон зуун жагсагч нийслэл дэх Тусгаар тогтнолын талбай руу нэвтрэхийг оролдох үеэр галт зэвсэг барьсан цэргүүд тэдний замыг хаасан байна. Мөн 125 мянган хүн амтай Канди хотын Перадения их сургуулийн ойролцоо жагссан олон зуун оюутны эсрэг нулимс асгаруулагч хий ашиглажээ.

Эх сурвалж: BBC

---