МҮОХ-ны VIII ээлжит чуулган өнөөдөр /2022.03.28/ эхэлж шинэ удирдлагыг бүрэлдэхүүнээ сонгох гэж байна. Одоогийн Ерөнхийлөгч МУГТ Н.Түвшинбаяр хүнд гэмт хэрэгт яллагдагчаар татагдсан, ээлжит чуулганы хугацаа дуусгавар болсон зэргээс шалгаалж ийн удирдлагын багт өөрчлөлт орж байгаа юм.

МҮОХ-ны Ерөнхийлөгчид одоогийн Тэргүүн дэд Ерөнхийлөгч Б.Баттүшиг, Биатлоны холбооны Ерөнхийлөгч Э.Мөнх-Очир, Монгол Улсын Ерөнхийлөгч асан Х.Баттулга нар нэрээ дэвшүүлсэн.

Харин, МҮОХ-ны ээлжит чуулганы өмнө Монгол улсын тав дахь Ерөнхийлөгч Х.Баттулга нэрээ татаж байгаагаа албан бичгээр хүргүүлжээ. Албан бичигт "Монголын жудо бөхийн холбооны ерөнхийлөгч Халтмаагийн Баттулга миний бие МҮОХ-ны ерөнхийлөгчийг сонгох сонгуульд нэрээ дэвшүүлсэн билээ. Яг энэ мөчид улс төрийн намын даргын сонгуульд нэр дэвшин өрсөлдөж байгаа тул МҮОХ-ны ерөнхийлөгчийн сонгуульд нэрээ дэвшүүлсэн өргөдлөөсөө татгалзаж байгааг та бүхэнд мэдэгдье. Олимпын хөдөлгөөн, олимпын байгууллага нь улс төрөөс ангид байж спортын шударга өрсөлдөөн, тамирчдын өндөр ур чадвар, эв нэгдлийн үзэл санага өндөрт өргөж явах учиртай" гэжээ. 

---