Өмнөд Солонгосын хилээр нэвтэрч буй тус улсын иргэд болон гадаадын аялагчид өнгөрөгч даваа гаргаас эхлэн зайлшгүй тусгаарлалтад орох шаардлагагүй болжээ. Ингэхдээ, зорчигчид коронавирусийн эсрэг вакцинжуулалтад бүрэн хамрагдсан байх ёстой бөгөөд тэднээс "ПСР" шинжилгээний "Сөрөг" хариу шаардах аж. 

Энэ талаарх албан ёсны мэдэгдэлд "Ковид-19-ийн эсрэг вакцин тариулж, вакцинжуулалтын мэдээллээ бүртгүүлсэн бүх зорчигчийг 3 дугаар сарын 21-нээс эхлэн долоо хоногийн тусгаарлалтаас чөлөөлнө" хэмээн тэмдэглэсэн байна.

Энэхүү шинэ журам ДЭМБ-ын зөвшөөрөлтэй вакциныг тариулсан бүх хүнд үйлчлэх хэдий ч Пакистан, Узбекистан, Украин болон Мьянмараас ирсэн зорчигчдод хамаарахгүй аж. Түүнчлэн, аялагчид дээд тал нь 180 хоногийн өмнө вакцин тариулсан байх шаардлагатай гэжээ.

БНСУ-д анх цар тахлын халдвар тархсанаас хойш бараг хоёр жилийн дараа ийнхүү тусгаарлалтын дэглэмийг цуцалсан нь тус улс дахь олон улсын аяллыг эргэн нээх төлөвтэй байна. Инчоны олон улсын нисэх онгоцны буудлаар энэ сарын эхний 20 хоногт өдөр бүр дунджаар 12,565 хүн зорчсон нь цар тахлын өмнөх үеийн 200,000-230,000 хүнтэй харьцуулахад ердөө тав орчим хувьтай тэнцэх үзүүлэлт юм.

Эх сурвалж: Yonhap News Agency, Arirang

---