Казах түмний хаврын баяр-Наурызыг тохиолдуулан Монгол Улсын Ерөнхийлөгч У.Хүрэлсүх эрхэлсэн ажил, салбартаа үр бүтээлтэй ажиллаж онцгой амжилт гарган, эх орныхоо хөгжил дэвшилд үнэтэй хувь нэмэр оруулж буй  хүмүүст төрийн дээд цол, одон, медаль гардууллаа.

ГАВЬЯАТ БАГШ ЦОЛООР:

Боловсролын салбарт 50 гаруй жил үр бүтээлтэй ажиллахдаа биологи, байгаль-экологийн олон зуун мэргэжилтэй боловсон хүчин, эрдэмтэн, багш, судлаачдыг бэлтгэж, сургалт, судалгааны 60-аад ном, гарын авлага, эрдэм шинжилгээний 100 гаруй бүтээл туурвиж, 4 шинэ бүтээл, оновчтой санааг дэвшүүлэн, 7 бүтээлийг үйлдвэрлэл практикт нэвтрүүлж, 3400 гаруй зүйлийн 14500 гаруй шавжийн эталон материал бүхий судалгааны санг бий болгон, 7 зүйлийн шавж, үет хөлт амьтдыг шинээр нээн илрүүлж, 80 гаруй зүйлийн амьтныг амьтны аймагт шинээр тэмдэглэж, биологийн шинжлэх ухааныг хөгжүүлэхэд оруулсан үнэтэй хувь нэмрийг нь үнэлж Монгол Улсын Их сургуулийн Шинжлэх ухааны сургуулийн Биологийн тэнхимийн зөвлөх багш, Шинжлэх ухааны доктор Каманы Улекпанд Монгол Улсын Ерөнхийлөгчийн зарлигаар Монгол Улсын гавьяат багш цол хүртээв.

• Нийслэлийн Налайх дүүргийн Ахмад багш нарын холбооны тэргүүлэгч Халийдолдойн Ризагуль;

СОЁЛЫН ГАВЬЯАТ ЗҮТГЭЛТЭН ЦОЛООР:

Монгол Улсын соёлын салбарт 48 жил ажиллахдаа хэвлэлийн бүтээгдэхүүний чанар, хүртээмжийг сайжруулах, чөлөөт хэвлэлийг хөгжүүлэхэд идэвх санаачилгатай ажиллаж, Төрөөс соёлын талаар баримтлах бодлогын баримт бичиг, хууль тогтоомжийн төслүүдийг боловсруулахад арга зүйгээр хангаж, улс орны хөгжил, хэвлэлийн салбарын тулгамдсан асуудлаар олон арван бүтээл туурвиж, дэлхийн 100 гаруй, үндэсний 320 гаруй үлгэрийг орчуулан хэвлүүлж, ард түмнийхээ оюуны хэрэгцээг хангахад мэдлэг чадвараа дайчлан ажилласан хөдөлмөр зүтгэл, хэвлэлийн үйлдвэрлэлийг хөгжүүлэхэд оруулсан бодит хувь нэмрийг нь үнэлэн “Дастан” ХХК-ийн зөвлөх, Соёл судлалын ухааны доктор, судлаач Татегийн Етекбайд Монгол Улсын Ерөнхийлөгчийн зарлигаар Соёлын гавьяат зүтгэлтэн цол хүртээлээ.

ГАВЬЯАТ ЭДИЙН ЗАСАГЧ ЦОЛООР:

• Авто тээврийн үндэсний төвийн дэд захирал Айпын Гылымхан;

ГАВЬЯАТ ТЭЭВЭРЧИН ЦОЛООР:

• Тээврийн цагдаагийн албаны ахмад ажилтан, Цагдаагийн бэлтгэл хурандаа Аивалын Саяболд;

ГАВЬЯАТ НИСГЭГЧ ЦОЛООР:

Монгол Улсын иргэний агаарын тээврийн салбарт тасралтгүй 36 жил ажиллахдаа 20,8 мянган цагийн нислэгийг амжилттай туулж, шинээр нээгдсэн нислэгүүдийн аюулгүй байдлыг хангахад идэвх санаачилгатай ажиллаж, 1991 оноос хойш Засгийн газрын экипажийн бүрэлдэхүүнд багтан гадаад айлчлалын тусгай, онцгой үүргийн нислэгүүдийн аюулгүй ажиллагааг хангаж, салбарын залуу боловсон хүчнийг сургаж, дадлагажуулахад мэдлэг туршлагаа зориулж, Халдварт цар тахал өвчний үед гадаадаас иргэдээ авч ирэх 25, олон улсын карго ачаа тээврийн 45 удаагийн тусгай үүргийн нислэгийг амжилттай гүйцэтгэж, Иргэний нисэхийн салбарын хөгжилд оруулсан бодит хувь нэмрийг нь үнэлэн “МИАТ” Төрийн өмчит хувьцаат компанийн Нислэгийн хэлтсийн дарга Таштуаны Ауезийг Монгол Улсын Ерөнхийлөгчийн зарлигаар Монгол Улсын Гавьяат нисгэгч цолоор шагнав.

ХӨДӨЛМӨРИЙН ГАВЬЯАНЫ УЛААН ТУГИЙН ОДОНГООР:

• Нийслэлийн Налайх дүүргийн 4 дүгээр хорооны өндөр настан Хулжайн Упей;
• Сэлэнгэ аймгийн Цагааннуур сумын “Тариан цацал” ХХК-ийн дэд захирал Аханы Көкөнай;

АЛТАН ГАДАС ОДОНГООР:

• Нийслэлийн Налайх дүүргийн 3 дугаар хорооны иргэн Кибекейн Кулзипа;
• “ДЦС-3” ТӨХК-ийн Горим тооцооны хэлтсийн тооцооны техникч Билдханы Кавидеш;
• Төв аймгийн Батсүмбэр сумын Мандал багийн малчин Мугараашийн Телүвмэд;
• Нийслэлийн Сонгинохайрхан дүүргийн Улсын бүртгэлийн хэлтсийн улсын бүртгэгч Калькейн Манас;
• Шарветханы нэрэмжит боксын клубын дасгалжуулагч Жапарханы Юльс;

ЦЭРГИЙН ГАВЬЯАНЫ ОДОНГООР:

• Хилийн дугаар ангийн Цэргийн сургалт, сахилгын албаны зохион байгуулалтын тасгийн дарга Билимын Аманбек;

ЦЭРГИЙН ХҮНДЭТ МЕДАЛИАР:

• Онцгой байдлын ерөнхий газрын дэргэдэх Уул уурхайн аврах 09 дүгээр ангийн аврагч, жолооч-холбоочин Мөтөөлийн Болот;

ХӨДӨЛМӨРИЙН ХҮНДЭТ МЕДАЛИАР:

• Нийслэлийн Налайх дүүргийн 4 дүгээр хорооны Иргэдийн Нийтийн Хурлын дарга Рахманы Жанарбек;
• Нийслэлийн Сонгинохайрхан дүүргийн 1 дүгээр хорооны “Буянт-Манал” өрхийн эрүүл мэндийн төвийн өрхийн эмч Сейлын Еркежан;
• Орон сууц, нийтийн аж ахуйн удирдах газрын төв түгээх төвийн машинист Бадамжавын Жоосой;
• “Принцесс” эмнэлгийн ерөнхий эмч Тилеубекийн Жанболат нарыг шагналаа.

Өдөр шөнө тэнцсэн энэ өдөр, үйлс бүтээлээ төрдөө үнэлүүлсэн хүмүүст болон гэр бүл, үр хүүхэд, төрөл садан, хамт олонд нь Монгол Улсын Ерөнхийлөгч У.Хүрэлсүх баяр хүргэлээ. Ажилч хичээнгүй казах түмэн аз жаргалаар бялхаж, ажил үйлс нь амжилт бүтээлээр халгин, Алтайн бүргэд мэт хийморьтой байхын ерөөлийг өргөн дэвшүүлэв.

---