БНХАУ-д сүүлийн жил гаруйн хугацаанд анх удаа коронавирусээс үүдэлтэй нас баралт бүртгэгджээ. Тус улсын Үндэсний эрүүл мэндийн хорооноос мэдээлснээр, өнгөрөгч бямба гарагт зүүн хойд Гирин мужид хоёр өвчтөн нас барсан аж.

Өнгөрсөн онд Хятадад коронавирусийн эндэгдэл ердөө хоёр удаа бүртгэгдсэн тул энэхүү мэдээлэл нь олныг цочирдуулаад байна. Энэ удаагийн халдварын давлагаа нь тус улсад тулгарсан хамгийн өргөн тархалттай дэгдэлт бөгөөд эрх баригчид богино хугацаанд хөл хорьж, шинжилгээний ажлыг эрчимжүүлэх замаар цар тахлыг бүрэн дарж авах арга барилыг хэрэгжүүлж байгаа юм.

Умард Солонгос, ОХУ-тай хиллэдэг Гирин муж нь уг давлагааны гол цөм бөгөөд орон нутгийн нийт халдварын тохиолдлын гуравны хоёр гаруй хувийг эзэлж байна. Тус мужийн хоёр дахь том хот болох Гиринд өнөөдөр оройноос эхлэн хөл хорих ба 4.5 сая орчим оршин суугч нь гурван өдрийн турш гэрээсээ гарах боломжгүй болох гэнэ.

Түүнчлэн мужийн нийслэл Чанчунь дахь хязгаарлалтыг чангатгаад байгаа билээ. Тус хотын есөн сая оршин суугч энэ сарын 11-нээс хойш хоёр өдөрт нэг л удаа хоол хүнс худалдаж авахаар гэрээсээ гарч байсан бол одоо зөвхөн эмнэлгийн ажилтнууд болон бусад албаны хүнийг гэрээсээ гарахыг зөвшөөрөх аж.

Одоогоор Хятадын бусад бүс нутагт хэдэн арван сая хүн хөл хорионд ороод байгаа бөгөөд удахгүй эрүүл мэндийн тогтолцоо нь хүнд байдалд орж болзошгүй гэж эмээсэн орон нутгийн эрх баригчид эмнэлгийн орны тоогоо нэмэхэд анхаарч ажиллаж байна.

Эх сурвалж: Reuters, AFP

---