ОХУ-ын төрийн мэдлийн "Первый канал" буюу 1-р сувгийн оройн мэдээллийн хөтөлбөрийн үеэр тус телевизийн редактор Марина Овсянникова гэнэт студид орж ирэн, Украин дахь түрэмгийллийг эсэргүүцэж буйгаа илэрхийлжээ. Тэрээр "Дайныг зогсоо. Суртал ухуулгад бүү итгэ. Энд та нарт худлаа ярьж байна. Оросууд дайны эсрэг" гэсэн бичиг барин, "Дайнд үгүй гэж хэл! Дайныг зогсоо!" гэж хэлж байгаа нь тод сонсогдсон юм.

Энэхүү явдал өнгөрөгч даваа гаргийн орой болсон бөгөөд одоо Овсянникова саатуулагдаад байгаа гэж түүний ойрын эх сурвалжууд үзэж байна. Тэрээр уг шууд дамжуулалтын өмнө Оросын ард түмнийг дайныг эсэргүүцэхийг уриалсан бичлэг хийж, олон нийтийн сүлжээндээ байршуулжээ. Тус бичлэгт Овсянникова "Украинд болж буй үйл явдал бол гэмт хэрэг. Кремлийн суртал ухуулгыг түгээгч газарт ажилладагтаа би ичиж байна. Зөвхөн ард иргэд бид л энэ галзуурлыг зогсоож чадна" хэмээн хэлсэн байна.

Оросын телевизүүдийн мэдээг Кремлийн зүгээс хатуу хянадаг бөгөөд томоохон сувгууд бие даасан үзэл бодлоо илэрхийлэх нь ховор байдаг. Одоо эдгээр сувгаар Украинд болж буй үйл явдлын орос хувилбарыг цацаж байгаа ба шинээр батлагдсан хууль тогтоомжийн дагуу Украин дахь нөхцөл байдлыг "халдлага" биш "цэргийн ажиллагаа" гэж нэрлэх ёстой төдийгүй энэ талаар "хуурамч" мэдээ тараахыг хууль бус болгосон аж.

Эдгээр шаардлагыг дагахаас татгалзсан бие даасан хэвлэл мэдээллийн хэрэгслүүд эрх баригчдын шахалтаас болж эфир, нийтлэлээ зогсоохоос өөр аргагүйд хүрээд байгаа юм.

Эх сурвалж: BBC, The Guardian

---