Шатахуун импортлогч компаниуд авто бензиний үнээ дахин нэмж, АИ-92 авто бензин литр тутамд 2390 төгрөгийн үнэтэй болов.

Шатахуун импортлогчид:

• Нэгдүгээр сард АИ-92 шатахууны үнийг литр тутамд 20, АИ95-ын үнийг 50 төгрөгөөр нэмж 2240 төгрөг болгосон
• Хоёрдугаар сард АИ-92 шатахууны үнийг литр тутамд 50 төгрөгөөр нэмж, 2285-2290 төгрөг болгосон
• Гуравдугаар сард АИ-92 шатахууны үнийг литр тутамд 100 төгрөгөөр нэмж, 2390 төгрөг болгов. 

Уул уурхай, хүнд Үйлдвэрийн яамнаас мэдээлэхдээ, “АИ-92 шатахууны үнэ 100 төгрөгөөр өссөн ч АИ-95 болон АИ-85-ийн үнэ нэмэгдээгүй. Ингэж нэмэгдэж байгаа нь дэлхийн зах зээл дээр газрын тосны үнэ өсөж байгаатай холбогдуулан нэмэгдхээс өөр аргагүй байдалд хүрсэн” гэв.

Шатахуун импортлогч компаниуд алдагдал их хүлээж байна гэх тайлбар өгөх боловч өнгөрсөн онд инфляцыг бууруулах зорилгоор Төв банк тэдэнд 300 тэрбум төгрөгийн зээл олгосон юм. Гэвч бодит байдал дээр үнэ өссөөр. Өргөн хэрэглээний барааны үнэ нэмэгдсээр. Иргэдийн нуруун дээрх ачаа хүндэрсээр байна. 

---