ОХУ-ын Ерөнхийлөгч Владимир Путин 2022 оныг дуустал зарим бүтээгдэхүүн, түүхий эдийн импорт, экспортыг хязгаарлаж, хориг тавих тушаал гаргажээ.

Оросын аюулгүй байдлыг хангахад чиглэсэн гадаад эдийн засгийн тусгай арга хэмжээний хүрээнд импорт, экспортыг нь хориглох бүтээгдэхүүнүүдийн жагсаалтыг тус улсын Засгийн газар ирэх хоёр долоо хоногийн дотор тодорхойлох юм.

Гэхдээ энэхүү хязгаарлалтад иргэдийн тээвэрлэж буй хувийн хэрэгцээний бүтээгдэхүүн, түүхий эд хамаарахгүй аж. Үүний дээрээс, эрх баригчид тодорхой бүтээгдэхүүн, хувь хүн, эсвэл компаниудад тусгай шаардлага тавих боломжтой гэжээ.

ОХУ нь үр тариа, металлын томоохон экспортлогч бөгөөд эдгээр бараа бүтээгдэхүүн нь хориг, хязгаарлалтад багтаж магадгүй гэж Барууны орнууд таамаглаж байна. Энэхүү арга хэмжээ нь бөөний үнийг цаашид улам өсгөх магадлалтай тул Оросын эрчим хүчний импортоос хамаарал багатай улсууд ч сөрөг нөлөө мэдрэх мадаглалтай юм.

Эх сурвалж: TASS, BBC

---