“МОНГОЛ ХҮНС-МОНГОЛ БАРАА 2022” арга хэмжээг 2022 оны нэгдүгээр сарын 20-30-ны өдрүүдэд Төв цэнгэлдэх хүрээлэнд зохион байгуулж байна. 

Уг арга хэмжээ нь дотоодод үйлдвэрлэсэн хүнс, өргөн хэрэглээний бараа бүтээгдэхүүний борлуулалтыг дэмжих, мал, амьтны гоц халдварт өвчингүй, тайван бүсээс малын гаралтай хүнсний түүхий эд, бүтээгдэхүүнийг Улаанбаатарчуудын хэрэгцээнд нийлүүлж байгаа юм. 
Хүнс, хөдөө аж ахуй, хөнгөн үйлдвэрийн яам, Улаанбаатар хотын Захирагчийн ажлын алба хамтран зохион байгуулж байгаа энэхүү арга хэмжээ нь цар тахлын амаргүй нөхцөлд үндэсний жижиг, дунд үйлдвэрлэл эрхлэгчид, малчдаа дэмжиж, 10 өдрийн турш түрээсийн төлбөргүйгээр бараа бүтээгдэхүүнээ борлуулах боломжийг бүрдүүлжээ.
Тус арга хэмжээг халдвар, хамгааллын дэглэмд нийцүүлэн задгай талбайд зохион байгуулж байгаа бөгөөд сүү, цагаан идээ, ууц, хэвийн боов, мах, махан бүтээгдэхүүн, гурил, жижиг дунд үйлдвэрийн ноос, ноолуур, арьс ширэн болон бэлэг дурсгалын бүтээгдэхүүнийг үйлдвэрлэгчийн үнээр, өргөн сонголттой худалдаалах юм. 
Үзэсгэлэн худалдаанд зарагдаж буй бараа бүтээгдэхүүний хувьд орон нутгаасаа хамааран үнэ ханшийн хувьд бага зэрэг өөр байсан юм. 
Үзэсгэлэн худалдаанд зарагдаж буй бараа бүтээгдэхүүний үнэ ханш: 

• Хэвийн боов ширхэг нь 3500-4500 төгрөг
• Хөхүүрийн айраг 1 литр нь 7000 төгрөг
• Аарц кг 6000 төгрөг
• Чацаргана кг 6000-10000 төгрөг
• Тавгийн иж бүрэн цагаан идээ 5 үетэй 350 мянган төгрөг
• Өрөм 20 мянган төгрөг
• Үхрийн мах кг нь 10 мянган төгрөг
• Жижиг хорхой ааруул 22 мянган төгрөг

Мах махан бүтээгдэхүүний хувьд гарал үүслийн бичигтэй, вакамжуулсан мах борлуулж байлаа. Гулуузаараа 180-200 мянган төгрөгөөр худалдаалж байна. 
Ууцны мах кг нь 9800 мянган төгрөг буюу  260-400 мянган төгрөгөөр борлуулж байна. 

---