БОАЖЯ-ны удирдлагуудыг чөлөөлж, тус яамны сайдаар ШӨХТГ-ын дарга Б.Бат-Эрдэнийг өчигдөр тохоон томилсон. Үүнээс үүдэн ШӨХТГ-ын дарга хэн болох нь анхаарал татаж байсан юм.  

Засгийн газрын өнөөдрийн хуралдаанаар ХЗДХЯ-ны ТНБД Б.Баасандоржийг чөлөөлж, МХЕГ-ын даргаар, МХЕГ-ын дарга Т.Гантулгыг чөлөөлж, ШӨХТГ-ын даргаар томилжээ.

Харин ХЗДХЯ-ны ТНБД-аар тус яамны Хуулийн бодлогын газрын дарга П.Сайнзоригийг, Сангийн яамны ТНБД-аар тус яамны Төсвийн бодлого, төлөвлөлтийн газрын дарга Ж.Ганбатыг томилсон байна.

Мөн, БОАЖ-ын дэд сайдаар Г.Түвдэндоржийг, ТНБД-аар А.Энхбатыг, Эдийн засаг, хөгжлийн дэд сайдаар С.Наранцогт томилохыг Засгийн газрын гишүүд дэмжжээ. 

Засгийн газрын хуралдаанаар ажилдаа хариуцлагагүй хандаж, шаардлагатай эм, бэлдмэлийн нөөц бүрдүүлээгүй, шүлхий газар авахад хүргэсэн албан тушаалтнууд болох Мал эмнэлгийн ерөнхий газрын дарга Д.Түмэндэмбэрэл болон Эм, эмнэлгийн хэрэгслийн хяналтын зохицуулалтын газрын дарга Б.Цэцэгсайхан нарыг үүрэгт ажлаас нь чөлөөлсөн байна. 

---