Төрийн байгуулалтын байнгын хорооны өнөөдрийн хуралдаанаар Олон нийтийн радио, телевизийн тухай хуулийн хэрэгжилт болон Монголын Үндэсний олон нийтийн радио, телевизийн Үндэсний зөвлөлийн үйл ажиллагааны талаарх мэдээлэл сонслоо. Мэдээлэл сонссоны дараа гишүүд үг хэлж байр сууриа илэрхийллээ.

УИХ-ын гишүүн М.Оюунчимэг:

 

-Өнөөдөр зүгээр тайлан сонсох асуудал биш болоод байна. Д.Батсүх даргаа таныг мундаг хуульч, өмгөөлөгч, тэнд очоод өөрчилнө гэж М.Наранбаатарыг огцруулаад дарга болгож байсан. Гэтэл энэ байгууллага өнөөдрийг хүртэл төсвөө баталж чадахгүй, хурлаа хийж чадахгүй байна гэдэг арай арчаагүй байна. Тэнд та бүхний 2021 оны долоо, наймдугаар сард төсвөө батлаад, өнөөдөр олон өөр өөр контент хийгээд, ковид цар тахлын энэ үед сайн ажиллаж байх ёстой байтал хурлаа хийж чадахгүй, эсвэл даргаа огцруулчих гээд, зарим хүмүүсийг "хуралдаа битгий ир" гээд сууж байна. Өнөөдөр хүртэл та хүмүүсээ бүрдүүлээд ирж чадсангүй. Ийм Үндэсний зөвлөлийн дарга байж болохгүй. Бид та бүхэнд итгээд "телевизээ өөр болго" гээд явуулсан. Үндэсний телевиз 700,800 хүндээ ч биш, тэдний цалин бусад телевизүүд дундаа хамгийн бага хэвээр байна. Ерөнхий захирал нь үйл ажиллагаагаа хэвийн, тогтвортой явуулах боломжгүй болж байна. Та бүхэн өөрсдийн цалингаа сар авахгүй бол юу болох билээ. Гэтэл байгуулагын төсвийг батлахгүй ингээд яваад байж болохгүй.

Бүх амьдралаа зориулсан хамт олон, дээрээс нь олон мянган үзэгч, татвар төлөгчдийн мөнгө үрэгдэж байна. Энэ тайлан дотор ийм контент санаачилсан гэсэн нэг ч тийм зүйл алга. Зургаан удаа хуралдаж чадаагүй, ирц ингэсэн тэгсэн гэсэн зүйл л байна. Хамт олон чинь сүүлдээ цөхрөөд "энэ хүмүүсийг цөөлөөд өгөөч" гэж гуйж байна. Зүгээр нэг тайлан сонсох биш, бид энэ асуудалд маш хариуцлагатай хандаж, бүр цаашлаад хуульд нэмэлт өөрчлөлт оруулдаг юм уу ТББХ нухацтай авч хэлэлцэх шаардлагатай гэж үзэж байна.

УИХ-ын гишүүн Н.Энхболд:

 

-Түрүү долоо хоногийн байнгын хорооны хуралдаанд бас байр сууриа илэрхийлж байсан. Энэ МҮОНРТ-ийн тухай хуулийг санаачилсан батлалцсан гишүүдийн нэг нь би байгаа юм. Энэ байгууллагын Үндэсний зөвлөл одоо ийм байдалтай байгаад харамсаж байна. Бид уул нь их сайхан зүйл бодож энэ хуулийг баталсан. Энэ нь Үндэсний зөвлөлийн гишүүддээ биш, хуульдаа асуудал байна уу гэж бодогдож  байна.

Үндэсний зөвлөл хуралдаж чадахгүй, төсвөө баталж чадахгүй байна гэж юу гэсэн үг вэ. УИХ төсөв баталж өгч чадахгүй бол тардаг хуультай. Үндэсний зөвлөл нь телевизийн УИХ юм. Тийм болохоор энэ жишгээр явах хэрэгтэй гэж бодогдож байна. Иймд хуульд нэмэлт өөрчлөлт оруулж, хүнийг муу сайнаар ярихаас хуулиараа зохицуулдаг байх нь зүйтэй. Ажлын хэсэг байгуулаад хуулийн асуудлыг хамт авч үзэх удирдамж гаргаж өгье. Тэгээд хууль батлагдсанаас хойшхи болсон үйл явдал, үр дүнд дүгнэлт хийгээд, хуульд нэмэлт өөрчлөлт хийх санал гаргаад байнгын хороогоор яриад тэгээд УИХ-д оруулсан нь зөв байх гэж бодож байна. 

УИХ-ын гишүүн Ё.Баатарбилэг:

 

-Үндэсний зөвлөлд ажиллаж байгаа эдгээр хүмүүсийг УИХ томилсон. Эдгээр 15 хүний талаас илүү нь байхгүй байна. Үндэсний зөвлөлийн гишүүдийг улстөржиж байна гэх нь хаашаа юм, гэхдээ миний мэдэхийн 20-иод жил хэрүүлтэй явлаа. Гаднаас захирал аваад ирэхээр хүлээн зөвшөөрдөггүй. Тогоон дотроосоо тавина гэдэг. Үндэсний зөвлөл нь хоёр гурав хуваагдаад хуралдаж  чаддаггүй. Улс төрчдийг лоббидож үндэсний зөвлөл рүү ордог. Үнэн юм чинь. Талцуулаад байгаа энэ хуралд ирээгүй тэр зөвлөлийн гишүүд, тэднийг лоббидож оруулж ирсэн улс төрчид бас анхаарах хэрэгтэй. УИХ үндэсний зөвлөлийн доторх тэр ажилд ороод шалгаад, тушаал шийдвэрийн зөв буруутай ноцолдохоос илүүтэйгээр Үндэсний зөвлөлийн хууль эрх зүйн орчинтой нь ноцолдох хэрэгтэй юм байна.

УИХ дээр ичихгүй хайнаагаа хаглуулах гээд сууж байгаа нь та нарын арчаагүй байдлынх. Үнэхээр ичмээр байна. Томилогдохдоо ямар ямар зүйл хэлээд гардаг билээ. Чуулганы завсарлагаанаар Байнгын хороо ээлжит бусаар хуралдаад энэ асуудлыг шийдээд явахгүй бол хаврын чуулганы хүлээвэл цаг алдана. Шалгалт оруулах асуудлыг хууль хяналтын байгууллага нь хийх хэрэгтэй байх гэж байр сууриа илэрхийлцгээлээ.

 

---