АНУ-ын Лос-Анжелес бүсийн төмөр замаар зорчиж өнгөрдөг ачааны галт тэрэгнүүдийг орон нутгийн иргэд дээрэмдэж, ачаа барааг нь хулгайлах явдал газар авчээ. Тэд өдөр бүр олон арван чингэлгийг дээрэмдэж байгаагийн улмаас төмөр зам хавиар олон мянган хайрцаг, бүтээгдэхүүн хөглөрөх болсон байна.

Хулгайчид галт тэрэгнүүдийн зогсох үеийг далимдуулан чингэлэг дээр нь авирч, цоожийг нь эвдэн, тээвэрлэж яваа бараа бүтээгдэхүүн, илгээмжийн хайрцгуудыг нь дээрэмдэж байгаа аж.

Гэвч тэд зөөвөрлөх болон дахин борлуулахад хэцүү, эсвэл хэтэрхий хямд бүтээгдэхүүнүүдээс татгалзаж байгаа бөгөөд үүний улмаас коронавирусийн шинжилгээний иж бүрдэл, эм тариа, овор ихтэй тавилга зэрэг зүйлс их хэмжээгээр хаягджээ.

Төмөр замын оператор "Union Pacific"-ийн мэдээлснээр, 2020 оны 12 дугаар сараас хойш Лос Анжелес бүсэд хулгайн гэмт хэрэг 160 хувиар өссөн байна. Мөн 2021 оны сүүлийн улиралд өдөрт дунджаар 90 гаруй чингэлэг дээрэмдүүлжээ.

Тус компанийн зүгээс орон нутгийн эрх баригчдад бичсэн захидалд "2021 оны 10 дугаар сард гэхэд л өмнөх оны мөн үетэй харьцуулахад хулгай 356 хувиар өссөн. Түүнчлэн дээрэмчид ажил үүргээ гүйцэтгэж байгаа ажилтнууд руу халдаж, зэвсэгт дээрэм үйлдэх явдал ихэссэн" хэмээн тэмдэглэсэн байна.

Энэхүү гэмт хэрэгтэй тэмцэхийн тулд "Union Pacific" нь дрон болон бусад тандалтын системийг ашиглан хяналтын арга хэмжээгээ чангатгаж, аюулгүй байдлын ажилтнуудын тоогоо нэмж байгаа аж. Цагдаа болон хамгаалалтын албаныхан 2021 оны сүүлийн гурван сард 100 гаруй хүнийг баривчилсан гэнэ.

Эх сурвалж: AFP

---