МҮОНТВ-ийн Үндэсний зөвлөлд лам Д.Жавзандорж, жүжигчин Н.Онон нар орсон нь олны эгдүүцлийг багагүй хүргэлээ. Энэ ч утгаараа Үндэсний зөвлөл гэж ямар учиртай байгууллага болохыг сурвалжлахад хүргэлээ.

Олон нийтийн радио, телевизийн тухай хуулиар жүжигчин Н.Онон хуулийн дагуу томилогдсон байна. Өөрөөр хэлбэл, тэр Соёл, урлагийн салбарын төлөөлөл мөнөөс мөн юм. Харин лам Д.Жавзандорж хууль зөрчин томилогдсоныг олон нийт ч, УИХ-ын гишүүд ч анзаарсангүй. Тэрээр Утга зохиолын салбарын төлөөлөл болж сонгогджээ. УИХ-ын гишүүд Н.Ононд “акцент” өгснөөс, хууль зөрчин томилогдож байгаа Д.Жавзандоржийг огт “эрүүдсэнгүй”. Энэ хүн утга зохиолын хүн мөн үү? Биш бол хууль зөрчин томилогдсон гэсэн үг. Биш бол их том хүний арыг даадаг чадалтай лам гэсэн үг. 

Хуулинд зааснаар МҮОНТВ-ийн Үндэсний зөвлөлийн 15 гишүүний дөрвийг нь Ерөнхийлөгч, долоог нь УИХ, дөрвийг нь Засгийн газар санал болгосноор УИХ зургаан жилийн хугацаатай томилдог. Томилохдоо салбар, салбарын төлөөлөл орохоор хуульчилж өгчээ. Тодорхой хэлбэл, Үндэсний зөвлөлийн 15 гишүүн дотор түүх уламжлал, ёс заншил, соёл урлаг, утга зохиол, шинжлэх ухаан, эрх зүй, гадаад харилцаа, сэтгүүл зүй, эрүүл мэнд, боловсрол, биеийн тамир, спорт, байгаль орчин, хөдөлмөр, нийгмийн хамгаалал, эдийн засаг, бизнес, техник технологи, удирдлага менежментийн чиглэлийн мэргэшсэн 15 хүн багтах учиртай. Гэтэл одоо бүрэлдээд байгаа Үндэсний зөвлөлийн бараг 80 хувь нь тухайн салбарын хүн биш байна.

 

Шинжлэх ухааны салбарын төлөөлөл болж түүхч Д.Өлзийбаатар, Соёл урлагийн салбарын төлөөллөөр жүжигчин Н.Онон, Сэтгүүл зүйн төлөөллөөр сэтгүүлч Д.Оюун-Эрдэнэ, менежментийн салбарын төлөөллөөр продюсер М.Уянга нар оржээ. Эд нарын хувьд хувьд хууль зөрчөөгүй, тухайн салбарын мэргэшсэн хүмүүс багтжээ.

Харин бусдынх нь хувьд, тухайлбал, Шашин, түүх, уламжлал, ёс заншлын салбарыг сэтгүүлч Ж.Цэсэн, Утга зохиолын салбарыг лам Л.Жавзандорж, Хөдөлмөр, нийгмийн хамгааллын салбарыг сэтгүүлч С.Алтанцэцэг, Биеийн тамир, спортын салбарыг сэтгүүлч В.Бат-Эрдэнэ, Боловсролын салбарыг өмгөөлөгч Д.Батсүх, Гадаад харилцааны салбарыг сэтгүүлч М.Наранбаатар, Байгаль орчны салбарыг нэвтрүүлэгч Д.Цоодол, Эрх зүйн салбарыг сэтгүүлч Д.Ганболд, Эдийн засгийн салбарыг сэтгүүлч, яруу найрагч Х.Чилаажав, Бизнесийн салбарыг хуульч /хэдхэн хоногийн өмнө Хөдөлмөрийн баатар болсон/ Н.Жанцан, Техник технологийн салбарыг сэтгүүлч Д.Отгонбаяр нар тус тус төлөөлсөн нь хууль зөрчжээ.

Угтаа бол энэ хүмүүсийн оронд тухайн салбарын “толгой” биш юм аа гэхэд, мэргэшсэн хүн эзлэх ёстой байжээ.

Ер нь энэ завхрал их эртнээс эхэлжээ.

Одоо байгаа бүрэлдэхүүнийг харахад тухайн үедээ Ерөнхийлөгчөөр ажиллаж байсан Х.Баттулга, УИХ-ын дарга асан З.Энхболд, Ерөнхий сайд асан Ч.Сайханбилэг нар “өөрийн” буюу өөр салбарын хүн оруулж, завхруулжээ. Энэхүү завхрал эрх баригч намаас намд шилжихдээ улам бүр төгөлдөршин завхарч байгаа аж.

Өөрөөр хэлбэл, 2020 оны арванхоёрдугаар сараас эхлэн МАН-ын гэгдэх хүмүүсээр сольж эхэлсэн талаар МҮОНТВ-ийн хуучин болон одоо байгаа ажилтнууд эгдүүцэн, шүүмжилж байна. Тухайлбал, 2020 оны арванхоёрдугаар сард “Монголын үнэн” сонины ерөнхий эрхлэгч Д.Ганболдыг томилжээ. Улс төржсөн томилгоо хийгээгүй байсан бол энэ хүний оронд эрх зүйн салбарын мэргэшсэн хүн томилогдох ёстой байв.

МҮОНТВ-ийн Үндэсний зөвлөл бол шууд утгаараа үзэгчид буюу татвар төлөгч та бидний төлөөлөл байх учиртай. Гэтэл та бид төлөөллөө сонгох, эрхгүйгээр улс төрчдөд энэхүү эрхээ алдаад удаж байна.

Айл өрх бүр сар бүр МҮОНТВ-д татвар төлдөг. Татвараар цалинждаг Үндэсний зөвлөл та биднийг төлөөлж чадаж байна уу? Чадахгүй байгааг намын бодлогоор томилгоогоор томилогдсон, өөр салбарын, мэргэшсэн бус дээрх хүмүүс харуулж байгаа бус уу.

Ийм тохиолдолд МҮОНТВ-д сар бүр татвар төлж, хуйвалдааны замаар батлуулсан Өргөн нэвтрүүлгийн хуулиар IPTV-үүдэд өрх бүр сар бүр 2000 төгрөг төлөх хэрэг байна уу?

---