Нийслэлийн 78 дугаар сургуулийн багш сурагчаа хэвтэрт ортол зодсон гэх асуудал саяхан дэгдлээ. 
Энэхүү хэрэг нь 2021 оны арваннэгдүгээр сарын 9-нд гарсан аж. Түүнээс хойш цахим сургалт эхэлж, 24-ний өдрөөс арванхоёрдугаар сарын 17-ны өдрийг хүртэл сурагч хичээлдээ хэвийн ирж байсан гэж тус сургуулийн нийгмийн ажилтан Ч.Зулзаяа хэлж байна. 

Нийслэлийн 78 дугаар дунд сургуулийн нийгмийн ажилтан Ч.Зулзаяа: 

-Энэ хэрэг 2021 оны 11 сарын 9-ний мягмар гарагт гарсан юм билээ. "Даалгавар хийсэнгүй" гэж хэд хэдэн сурагчийг анги удирдсан багш Амаржаргал нь номоор цохисон гэсэн. Маргаашаас нь эхлээд сурагч Сумъяабат хичээлдээ ирээгүй. "Эмнэлгээр явж байгаа, өвчтэй" гэж мэдүүлсэн байсан. Тэр долоо хоногтоо танхимаар хичээллээд, дараа долоо хоногоос нь улс даяар цахим руу шилжсэн. Тэрнээс хойш мэдээлэлгүй байж байтал уг сурагчийн ээж Туяа нь "Хүүхэд гэмтээсэн байна, цагдаад хандана" гэдэг асуудлыг сургуулийн захиргаанд тавьсан. 

Энэ дагуу сургуулийн захиргаа хуралдаад, уг багшид сахилгын шийтгэл оногдуулж, Зөрчлийн хуулиар 300 мянган төгрөгөөр торгож, ээж, хүү хоёртой нягт холбоотой байхыг үүрэг болгосон. Амаржаргал багш "Уулзъя" гэж утсаар зөндөө хэлсэн юм билээ. Тэгэхэд ээж нь "Би өглөө гараад, орой орж ирдэг. Амжихгүй. Тэгээд ч цагдаа, шүүхээр явна" гэдэг зүйл хэлээд байсан байдаг. 

Гэтэл гэнэтхэн хэвлэлээр энэ асуудал гараад ирсэн. Сургуулиас томилогдсон хүмүүс гэрт нь очсон. Ээж нь бидэнд ямар нэгэн бичиг баримт харуулаагүй. "Цагдаа хураагаад авчихдаг юм билээ. Цагдаа, шүүхээр явна" гэдэг зүйл яриад байгаа. Мөн, Амаржаргал багшийг торгосон 300 мянган төгрөгийг өөрт нь ирнэ гэж ойлгосон байна лээ. Цагдаа нь "Зөрчлийн торгуулийн мөнгө улсын санд ордог. Эмнэлгийн зардлаа тусад нь нэхэмжлэх боломжтой" гэж хэлсэн байсан. 

Шүүх эмнэлгийн дүгнэлтийг харахгүй бол хэн ч мэдэхгүй байна л даа гэсэн хариулт өглөө. 

---