Өмнөд Солонгосын Ерөнхийлөгч асан Пак Гын Хэг тус улсын Засгийн газар өршөөлөөр суллахаар болсноо өнөөдөр зарлажээ. 69 настай Пак нь 2017 оны 3 дугаар сараас хойш авлига, албан тушаалаа урвуулан ашигласан хэргээр 22 жилийн хорих ялаа эдэлж байгаа билээ.

Тэгвэл Ерөнхийлөгч асны биеийн байдал муудаж байгааг харгалзаж үзэн, ийнхүү өршөөл үзүүлсэн байна. Энэ жил тэрээр мөр, нурууны архаг өвчний улмаас гурван удаа эмнэлэгт хэвтсэн. Мөн 2019 онд мөрөндөө мэс засал хийлгэсэн юм. Түүнийг одоо хэвтэн эмчлүүлж байгаа "Самсунг" эрүүл мэндийн төвөөс шууд суллана гэж албаны эх сурвалж мэдээлжээ.

Түүнчлэн Пак Гын Хэд өршөөл үзүүлэх нь үндэсний эв нэгдлийг бэхжүүлэхэд тусална гэж эрх баригчид тэмдэглэсэн байна. БНСУ-ын Засгийн газраас шинэ оны өмнөхөн өршөөлөөр суллагдах 3,094 хүний жагсаалтыг гаргасан бөгөөд энэхүү шийдвэр нь коронавирусийн цар тахлын улмаас үүссэн үндэсний хямралыг даван туулахад тусалж, "Өнгөрсний харамсалтай түүхээс урагшилж, ард түмэн эв нэгдэлд хүрэхэд чухал ач холбогдолтой" хэмээн мэдэгджээ.

Пак Гын Хэ суллагдах болсон нь ирэх оны 3 дугаар сард болох Ерөнхийлөгчийн сонгуульд чухал нөлөө үзүүлнэ гэж шинжээчид үзэж байна. Тус улсын Дэгү болон Хойд Кёнсан мужийн сонгогчид Пакыг ихээр дэмжиж байсан бөгөөд эдгээр бүс нутаг нь сөрөг хүчний намын тулгуур хэсэг юм.

Энэ удаагийн өршөөлийн арга хэмжээний хүрээнд, мөн Ерөнхий сайд асан Хан Мён Сүгийг цагаатгахаар болжээ. Тэрээр 2015-2017 оны хооронд хээл хахуулийн хэргээр ялаа бүрэн эдэлсэн юм. Тэгвэл мөн хээл хахуулийн хэргээр 17 жилийн хорих ял эдэлж байгаа Ерөнхийлөгч асан И Мён Багийг өршөөлд хамруулаагүй байна.

Эх сурвалж: Yonhap News Agency

---