Сэлэнгэ аймгийн Засаг дарга Ш.Оргил эрүүл мэндийн шалтгаанаар ажлаа өгч түүний оронд аймгийн ИТХ-ын ээлжит хуралдаанаар Мандал сумын Засаг дарга бөгөөд Зүүнхараа хотын захирагчаар ажиллаж байсан, аймгийн ИТХ-ын тэргүүлэгч Н.Лхагвадоржийг томилсон талаар бид өмнө нь мэдээлсэн. 

Тэгвэл өнөөдөр /2021.12.17/ Мандал сумын ИТХ-ын VIII дугаар хуралдаан болж, нийт 5 асуудал хэлэлцсэн байна. Хамгийн эхэнд Мандал сумын Засаг даргыг сонгох асуудлыг шийдвэрлэлээ. 

Тус сумын ИТХ-ын Монгол Ардын намын бүлгийн зүгээс Мандал сумын ИТХ-ын дарга Батсүхийн Ганболдыг нэр дэвшүүлсэн бол Ардчилсан намын бүлгийн зүгээс аймгийн ИТХ-ын төлөөлөгч Төмөрбаатарын Батзулыг нэр дэвшүүлжээ. Санал хураалтад сумын ИТХ-ын 30 төлөөлөгч оролцсон ч эхний санал хураалтын дүнгээр 4 саналын хуудас хүчингүй гарсан аж. Үлдэх 26 саналыг тоолоход нэр дэвшигчдийн санал 13:13 болон тэнцжээ.

Дахин санал хураалтаар хүчингүй хуудас гараагүй бөгөөд нийт 30 төлөөлөгчийн 17 санал буюу  56,6%-ийг Б.Ганболд авч Мандал сумын Засаг дарга бөгөөд Зүүнхараа хотын захирагчаар сонгогдлоо. Харин нэр дэвшигч Т.Батзул 13 санал буюу 43,3% санал авчээ.

Мандал сумын Засаг даргаар сонгогдсон Б.Ганболдыг Сэлэнгэ аймгийн засаг дарга Н.Лхагвадорж батламжлах бөгөөд сумын ИТХ саналаа аймгийн даргад уламжилжээ. 

---