Швед улсын түүхэн дэх анхны эмэгтэй Ерөнхий сайд өнгөрсөн долоо хоногт эвслийн Засгийн газраас сонгогдсон боловч ердөө 12 цаг үүрэг гүйцэтгээд эвсэл задарсны улмаас огцорсон юм. Тэгвэл Социал Демократ намын дарга хатагтай Магдалена Андерссон даваа гарагт явуулсан санал хураалтаар цөөн тооны санал илүү авч дахин сонгогдсон байна. Тэрээр ирэх жилийн есдүгээр сард болох сонгууль хүртэл нэг намын Засгийн газрыг тэргүүлнэ.

54 настай Андерссон Ногоон намтай хамтран эвслийн Засгийн газар бүрдүүлэх оролдлого хийсэн боловч төсвийн санал нь батлагдаагүйн улмаас Ногоон нам эвслээс гарсан. Тус улсын Үндсэн хуулиар эвсэл задрах үед Засгийн газрын тэргүүн үүрэг гүйцэтгэх боломжгүй болдог.

Дахин сонгогдсоныхоо дараа Андерссон нийгмийн халамж, цаг уурын өөрчлөлт, гэмт хэргйн эсрэг төвлөрсөн бодлого хөтөлбөр боловсруулахаа мэдэгджээ. Гэсэн ч тэрээр бусад намын дэмжлэггүй бол Парламентад хуулийн төслөө батлуулах амаргүй. Түүний удирддаг Социал Демократ нам Парламентын 349 суудлаас 100 нь эзэлдэг.

Андерссон Упсала хотын их сургуулийн төгсөгч бөгөөд усанд сэлэлтийн аварга тамирчин юм. Улс төрийн карьераа 1996 онд эхлүүлж, өнгөрсөн долоон жилийн хугацаанд Сангийн сайдаар ажиллажээ.

Эх сурвалж: ВВС

---