БНЧУ-ын Ерөнхий сайд Петр Фиалаг батламжлах ёслол өчигдөр болсон байна. Гэвч Чехийн Ерөнхийлөгч Милос Земаны коронавирусийн шинжилгээ эерэг гарсан тул Ерөнхий сайдыг өргөмжилж, батламжлах ёслолыг шилэн хоргон дотроос удирджээ.

Өнгөрсөн аравдугаар сард болсон сонгуульд төвийн болон төвийг сахисан барууны сөрөг хүчний таван намын эвсэл ялалт байгуулснаар тэднийг удирдсан Фиала Ерөнхий сайдаар сонгогдсон юм.

Тус улсын Ерөнхий сайд асан Андрей Бабишийн оффшор дахь хөрөнгөтэй холбоотой санхүүгийн баримт бичиг Пандора Пейпэрст гарсны дараахан сонгууль зарлагдсан. 67 настай тэрбумтан уг баримтыг үгүйсгэсэн ч иргэд сөрөг хүчнийг сонгосон.

Шинээр томилогдсон Засгийн газар коронавирусийн халдвартай тэмцэх хүндхэн үүрэг хүлээж байна. Эмнэлгүүд даацаа хэтрүүлсний сацуу эрчим хүчний хямрал нүүрлээд байгаа юм. Шинэ эвслийн Засгийн газар 2022 оны төсвийг дахин хэлэлцэхээр төлөвлөж байна.

Ерөнхий сайд Фиала ард иргэдийг вакциндаа идэвхтэй хамрагдахыг уриалж, эрүүл мэндийн салбарын ажилтнуудад талархал илэрхийлжээ. Чехийн иргэдийн 58,5 хувь нь вакцинжуулалтад хамрагдсан байна.

Эх сурвалж: The Guardian

---