Коронавирусийн Омикрон хувилбар Өмнөд Африкийн Бүгд Найрамдах улсад бүртгэгдсэнтэй холбогдуулан дэлхийн улс орнууд хилээ дахин хааж, Өмнөд Африкаас зорчигч хүлээж авахаас татгалзаад байна. Өмнөд Африкийн Ерөнхийлөгч Кирил Рамафоса хөрш зэргэлдээ болон хилийн хориг тавиад байгаа улс орнуудад хандан хилээ хаасан явдлыг нь шүүмжилж, сэтгэл дундуур байгаагаа илэрхийлэн, хоригоо нэн даруй цуцлахыг уриалсан байна.

Өмнөд Африкаас зорчигч хүлээж авахаас татгалзсан улс орнуудын дунд Их Британи, Америк, Европын холбооны орнууд багтжээ. Коронавирусийн Омикрон хувилбар нь бусад хувилбаруудтай харьцуулахад өндөр хэмжээнд хувирсан байгаа тул дархлаажуулалтад хамрагдсан иргэд болоод өмнө коронавирусээр халдварлаж дархлаа тогтсон иргэдэд дахин халдварлах өндөр эрсдэлтэй гэж эрдэмтэд анхааруулсан.

Ерөнхийлөгч Рамафосагийн хэлснээр хилийн хориг тавьснаар халдварын тархалт буурна гэдэг нь шинжлэх ухааны үндэслэлтэйгээр батлагдаагүй зүйл бөгөөд энэ нь эдийн засгийг сүйрүүлэх эрсдэлтэй гэдгийг сэрэмжлүүлжээ.

ДЭМБ-ын мэдээлснээр шинэ хувилбар энэ сарын эхэнд Өмнөд Африк улсад бүртгэгдсэний дараа ДЭМБ-д албан ёсоор мэдэгдсэн байна. Омикрон хувилбар бүртгэгдсэн Өмнөд Африкийн Гуатенг мужид өнгөрсөн хоёр долоо хоногийн хугацаанд халдварын тохиолдол эрс нэмэгджээ.

Өмнөд Африкаас гадна Ботсвана, Хонконг, Бельги, Герман, Итали, Чех, Австрали, Их Британи улсуудад одоогоор Омикрон хувилбар илрээд байна. Тэдгээр Омикрон хувилбараар халдварласан хүмүүс бүгд ойрын хугацаанд Өмнөд Африк, Мозамбик, Египет улсуудад зорчжээ. Хамгийн сүүлд авсан мэдээллээр Нидерланд улсын Амстердам хотод Өмнөд Африк улсаас ирсэн 61 зорчигчид шинжилгээ хийхэд 13-аас нь Омикроны халдвар илэрсэн байна.

Эх сурвалж: ВВС, The Guardian

---