УОК-оос онцын шаардлагагүй бол гадаад улс орнуудад аялахгүй байх, шинэ мутаци бүртгэгдсэн болон зөөвөрлөгдсөн улсад зорчсон иргэдийг өөрсдийнх нь зардлаар 10 хоног тусгаарлах шийдвэр гаргасан.

Эрүүл мэндийн сайд С.Энхболд: Шинээр бүртгэгдсэн вирус нь вакцины идэвхийг сулруулах магадлалтай ба халдвар тархаах чадвар нь дельта хувилбараас хэд дахин илүү байна. Бид одоогоор ямар нэгэн арга хэмжээ авахгүй, ажиглалтын байдалд байна.

Хэрэв мутацид орсон шинэ хувилбар манай улсад бүртгэгдлээ гэхэд бид ядаж бүүстер тундаа бүрэн хамрагдсан байх шаардлагатай. Мөн онцын шаардлагагүй бол гадаадад зорчихгүй байхыг уриалж байна. Дельта вирусийн нууц үеийн хугацаа 3-5 хоног байдаг. Одоо 10 хоног тусгаарлагдах иргэдээс 3 болон 6 дахь өдөрт шинжилгээ авч баталгаажуулна. 

Өмнөд Африкт бүртгэгдсэн “Омикрон” хувилбар нь маш хурдан тархах чадвартай бөгөөд вакцинд тэсвэртэй. Нийгмийн сүлжээгээр ДОХ-ын вирустэй хавсарсан гэх мэдээлэл явж байна. Энэ бол ор үндэслэлгүй мэдээлэл. Энэ вирус дархлаа султай хүний биед үүссэн байх магадлалтай гэж үзэж байгаа. Шинэ вирус тархаж байгаа зам нь дархлал дарангуйлдаг эм хэрэглэсэн, архаг суурь өвчтэй хүмүүст илүүтэй байна. Өмнөд Африк улс ДОХ тохиолдол өндөр учир ДОХ-той холбож ойлгоод байх шиг байна. ДЭМБ ДОХ-той холбож ямар нэгэн тайлбар хэлээгүй байна.

---