Сандийп Арорагийн төрсөн гэр Энэтхэгийн Пунжаб мужийн Жаландар хотод байдаг. Эхнэр, хүү, эцэг эх нь тэнд амьдардаг ч Арора Хонконгт зоогийн газарт ажилладаг. Тэр гэр бүлтэйгээ 2020 оны гуравдугаар сараас хойш уулзаагүй байна.

Харин Эми Стотт 2019 оноос хойш Английн Манчестер хотод амьдардаг эцэг эхтэйгээ уулзаж чадаагүй ажээ. Саби Гурунгийн уулархаг Балба улсад амьдардаг ээж, аав нь хоёр жилийн турш түүнийг ирэхийг хүлээсэн байна.

Тэд бүгд Хонконгийн "Black Sheep" сүлжээ зоогийн газарт ажилладаг. Тэгвэл тус зоогийн газар удаан хугацаанд гэрийнхэнтэйгээ уулзаагүй 250 ажилтандаа тусалж, замын бүх зардал болох 650,000 ам.долларыг даахаар болжээ. Үүний ачаар тэдгээр ажилтнууд Аргентин, Нигер, Франц, Өмнөд Африк, Австрали зэрэг дэлхийн өнцөг булан бүрт амьдарч байгаа гэр бүлийнхэнтэйгээ уулзах аз тохиосон байна.

Уг санаачилгыг "Black Sheep" сүлжээ зоогийн газрын үүсгэн байгуулагчид болох Сайд Асим Хуссайн, Кристофер Марк нар гаргажээ. Энэ нь 250 ажилтанд гайхалтай зул сарыг бэлэг болох нь гарцаагүй юм.

Эх сурвалж: CNN

---