Арваннэгдүгээр сарын олон улсын нислэгийн хуваарийн дагуу энэ сард нийт 39 удаагийн тусгай нислэг төлөвлөсөн. Тухайлбал Сөүл, Токио, Истанбул, Алматы, Франкфурт чиглэлд агаарын тээврийн "МИАТ" ТӨХК, Хүннү Эйр, Аэромонголиа компани болон Korean Аir, Turkish Аirlines, Asiana Аirlines компани нислэг үйлдэх хуваарьтай байгаа юм. Өнөөдрөөс буюу 25-наас хойш нийт 16 нислэг хийх бөгөөд гадаад руу зорчих иргэд халдвар хамгаалалтын дэглэмээ сайтар баримтлахыг анхааруулж буй.

Хуваарьт нислэгээс гадна зорчигчдын хүсэлт, эрэлтийг харгалзан агаарын тээвэрлэгчид нисэн очих улсын хилийн хориг, хязгаарлалтгүй тохиолдолд захиалгат нислэг үйлдэнэ. Тиймээс гадаадын улс оронд зорчих иргэдийн гол анхаарах зүйл нь вакцины нэмэлт тундаа хамрагдсан, Covid-19-өөр өвдөөд эдгэснээ нотлох баримттай байх нь чухал.
Улс орон бүр ямар вакцинтай иргэдийг хилээр нэвтрүүлэх зохицуулалт нь өөр өөр байгаа. Харин спутник вакцины тунтай АНУ, Канад зэрэг улс руу зорчих гэж буй иргэд дөрөв дэх тунгаа ХӨСҮТ-д өргөдөл гаргаад хийлгэсний үндсэн дээр явж байгаа гэдгийг анхаарах нь зүйтэй.

Гадаад улс орноос Монголд ирж байгаа иргэд дараах шаардлагыг биелүүлэх ёстой 

Бусад улс орноос Монгол руу ирж байгаа иргэдэд дараах шаардлагыг тавьж байгаа. Үүнд:

• Хилийн боомтоор нэвтрэхээс өмнөх 72 цагийн дотор PCR шинжилгээ хийлгэсэн, шинжилгээний “сөрөг” хариутай байна. Өвдөөд эдгэрсэн тохиолдолд эдгэрснийг нотлох баримт бичгийг үзүүлэн хилээр нэвтэрнэ.
• Түүнчлэн Covid-19-ийн эсрэг вакцины бүрэн тун авснаас хойш 14 хоногийн хугацаа өнгөрсөн бол, эсвэл өвдөөд эдгэрснийг нотлох баримт бичигтэй тохиолдолд гэрийн тусгаарлалтад орохгүй юм.
• Харин, Covid-19-ийн эсрэг вакцинд хамрагдаагүй, бүрэн тун хийлгээгүй, бүрэн тунд хамрагдсанаас хойш 14 хоног болоогүй, вакцины дараах 14 хоног өнгөрсөнч гэр бүлийн болон асран халамжинд байгаа 0-18 насны вакцин хийлгээгүй хүүхэдтэй хамт ирсэн хүн долоо хоногийн хугацаанд гэрийн тусгаарлалтад байх шаардлагатай.

Эдгээр тохиолдолд ирсэн даруйд оршин суугаа нутаг дэвсгэрийн харьяа өрхийн эмнэлэгтээ гадаадаас ирж, гэрийн тусгаарлалтад орсон тухайгаа мэдэгдэн, өрхийн эмчийн хяналтад орно. Гэрийн тусгаарлалтын хугацаанд гэртээ зочин урихгүй байх, олон нийтийн газар явахгүй байх зэрэг халдвар, хяналтын дэглэм сахихаас гадна биеийн халууныг тогтмол хянаж, Covid-19-ийн сэжигтэй шинж тэмдэг илэрвэл яаралтай өрхийн эмнэлэгтээ хандаж,  PCR шинжилгээнд хамрагдах хэрэгтэй. Эмнэл зүйн шинж тэмдэг илрээгүй тохиолдолд хөл хориог дуусгаж хэвийн амьдралын горимд шилжих аж.

---