Өнөөдрийн байдлаар шатахуун импортлогчид АИ-92 шатахууны хувьд 300-400 төгрөгийн алдагдал хүлээж байгаа. Тэгвэл шатахууны үнийг чөлөөлөх асуудлыг ярьж эхэлжээ. 

Газрын тосны бүтээгдэхүүний хангамж, үнийг тогтворжуулах ажлыг зохион байгуулах, хяналт тавих үүрэг бүхий төр, хувийн хэвшил, иргэний нийгмийн хамтарсан зөвлөлийн хуралдаан өнөөдөр боллоо. Уг зөвлөлийн хуралдаанаар дөрвөн асуудал авч хэлэлцсэн байна.

УУХҮ-ийн дэд сайд О.Батнайрамдал: 

-Уул уурхай, хүнд үйлдвэрийн яам, АМГТГ, шатахуун худалдаа эрхлэгч аж ахуйн нэгжүүдэд өргөн хэрэглээний АИ-92 автобензины хангамж, нөөцийг Засгийн газрын холбогдох тогтоолд заасан хэмжээгээр бүрдүүлж, тус бүтээгдэхүүний жижиглэнгийн үнийг огцом хэлбэлзэлгүйгээр зах зээлийн горимд аажмаар шилжүүлэх горимыг баримтлан ажиллах зөвлөмж гарсан.

АИ-92 шатахууны хувьд зах зээлийн горим руу шилжих ёстой. Үүний хүрээнд Олон улсын валютын сангаас зөвлөдөг, олон оронд сайн жишиг болсон зургаан сарын дундаж, өртгөөр үнийг тооцоолох автомат үнийн тооцооллын арга руу шилжихээр боллоо.

Энэ нь огцом үнэ нэмэгдэхгүй гэсэн үг. Сүүлийн зургаан сарын импортын үнийн дунджийг төр, хувийн хэвшлийн оролцоогүйгээ автоматаар тооцоолон гаргана гэсэн үг. Одоо байгаа ханш болох 2050 төгрөгөөр тооцох юм бол нэг удаагийн үнийн хэлбэлзэл 100 төгрөгөөс хэтрэхгүй байхаар зохицуулалтыг оруулж ирж байна гэсэн үг. Уг зөвлөмжийг хэрэгжүүлэх боломжтой хэмээн шатахуун импортлогчид дэмжсэн. Зах зээлийн горимоор шатахуун импортлогчид 100 төгрөгөөс хэтрэхгүй үнээр АИ-92 шатахууны үнээ нэмнэ нь гэсэн үг. Тэгэхээр ойрын үед шатахуун импортлогчид АИ-92 шатахууны үнийг 100 төгрөгөөр нэмнэ гэв.

---