АНУ-ын Висконсин мужид болж байсан Зул сарын баярын жагсаалын үеэр нэгэн автомашины жолооч олны дундуур хурдтай жолоодож, 20 гаруй хүнийг дайрсан бөгөөд хохирогчдын зарим нь амиа алдсан гэж орон нутгийн цагдаа нар мэдээлжээ.

Уокеша хотод өнөөдөр болсон ослын улмаас гэмтсэн хүмүүсийн дунд хүүхдүүд байсан гэж албаныхан тэмдэглэсэн байна. Мөн нийт хэдэн хүн амиа алдсан нь тодорхойгүй байгаа бөгөөд хохирогчдын ар гэрт мэдэгдэхээс нааш дэлгэрэнгүй мэдээлэл өгөхгүй гэсэн юм. Хотын Гал түймрийн албанаас нийт 11 насанд хүрэгч, 12 хүүхдийг ойролцоох эмнэлэгт хүргэсэн байна.

Хэргийн газарт байсан нэгэн гэрч "Бид тэр машиныг жагсаалын цувааны хажуугаар хамаг хурдаараа явж байгааг харсан. Дараа нь бид маш чанга юм мөргөх чимээ сонссон бөгөөд хүмүүс орилж, хашхирч эхэлсэн" гэж ярьжээ.

Цагдаа нар одоо тус машиныг олж илрүүлэн, сэжигтнийг саатуулаад байгаа бөгөөд мөрдөн байцаалтын ажиллагаанд Холбооны мөрдөх товчооноос тусалж байгаа аж. Хэрэг гарсан үеэр цагдаа нар машиныг зогсоохын тулд гал нээсэн гэж мэдээлжээ. Энэ хэргээс хойш Уокешагийн бүх улсын сургуулийг хаагаад байгаа гэнэ.

Эх сурвалж: BBC

---