Увс аймгийн Өмнөговь сумын ИТХ-ын дарга, тус аймгийн ИТХ-ын төлөөлөгч Д.Даваасүрэн тэргүүтэй хүмүүсийг бусдаас хээл хахууль авсан хэрэгт холбогдуулан АТГ-ынхан шалгаж эхэллээ.

Уг хэрэгт сэжиглэгдсэн гурван эрэгтэй, нэг эмэгтэйг тус аймаг дахь ШШГА-ны Цагдан хорих байранд энэ сарын 17-18-нд шилжих шөнө саатуулсан гэдгийг орон нутгийн эх сурвалжууд мэдээлэв.

Энэ талаар албаны хүмүүсээс тодруулахад “Увс аймагт АТГ-ын мөрдөгчид ажиллаж байгаа нь үнэн. Албан тушаалаа урвуулж, хууль зөрчсөн байж болзошгүй хүмүүст хэрэг бүртгэлтийн хэрэг нээн шалгаж байгаа. Үүнээс өөр мэдээлэл одоогоор өгөх боломжгүй” гэв.

Орон нутаг дахь баттай эх сурвалжууд “Өмнөговь сумд байгаль орчны нөхөн сэргээлт хийнэ гэж ИТХ дарга, төлөөлөгчдөд хахууль болгож багагүй хэмжээний мөнгө аж ахуйн нэгжийн удирдах, гүйцэтгэх албан тушаалтнууд өгсөн юм билээ. Үүнтэй нь холбогдуулж хахууль өгсөн хүмүүсийг урьд шөнө цагдан хорьсон. Нөхөн сэргээлт нэрээр ашигт малтмал олборлох гэж байсан аж ахуйн нэгжүүдийн албан тушаалтнууд эрх авахын тулд хахууль өгч, шийдвэр хурдан гаргуулахыг хүссэн бололтой” хэмээсэн юм. 

---