Их Британийн долоо хоног тутмын шилдэг цомгийн чартын тулаанд Шведийн "Абба" хамтлаг ялалт байгуулж, тус хамтлаг түүхэндээ 10 дахь удаагаа энэхүү амжилтад хүрэв.

Алдарт хамтлагийн 40 жилийн дараа гаргасан шинэ цомог "Voyage" нь шилдэг цомгийн чартын нэгдүгээрт бичигдсэн бөгөөд сүүлийн дөрвөн жилийн хугацаанд нээлтийн долоо хоногтоо хамгийн их борлуулагдсан цомгоор шалгарчээ. Тус цомгийн борлуулалт эхний долоо хоногтоо 204 мянган ширхэгт хүрсэн нь Эд Шираны "Divide" цомгоос хойших хамгийн өндөр үзүүлэлт юм.

"Абба"-гийн үүнээс өмнө гаргасан сүүлийн цомог болох 1981 оны "The Visitors" цомог нь мөн л уг чартыг тэргүүлж байсан билээ. Хамтлагийн зүгээс "Official Charts Company"-д өгсөн ярилцлагадаа "Бидний цомог чартуудыг дахин тэргүүлсэнд үнэхээр их баяртай байна" хэмээн ярьжээ.

Түүнчлэн "Voyage" цомгийн пянз нь энэ зууны хамгийн хурдан борлуулагдсан пянзаар тодорсон байна. Одоо зөвхөн "The Beatles" болон Элвис Пресли нар л "Абба" хамтлагаас илүү урт хугацаанд чартын нэгдүгээр байрт бичигдсэн уран бүтээлчид болоод байгаа аж.

Уг шинэ цомог хөгжим сонсогчдын дунд хит болоод байгаа хэдий ч шүүмжлэгчдийн саналыг хуваагаад байгаа юм. "Rolling Stone" энэхүү цомгийг "Абба" хамтлагийн 1970-аад амжилттай дүйцүүлэн, "сонгодог Абба" гэж дүгнэсэн бол "The Guardian" сонинд хамтлагийн шинэ бүтээлийг "урам хугалсан явдал болсон" гэж шүүмжилсэн байна.

Эх сурвалж: BBC

---