ОХУ-ын Либерал ардчилсан намын дарга Владимир Жириновский сүүлийн нэг жил хагасын хугацаанд нийт долоон удаа вакцин тариулсан бөгөөд үүний зургаа нь коронавирусийн эсрэг вакцин байсан гэж мэдэгджээ.

Тэрээр эхлээд "Спутник V" вакцины хоёр тунгаа тариулсан бөгөөд эсрэг бие нь буурч эхлэхэд гурав дахь тунгаа тариулсан аж. Тэгвэл үүнээс зургаан сарын дараа Жириновский Оросын өөр нэг вакцин болох "ЭпиВак"-ийн хоёр тунд хамрагдсан байна. Ингээд тус вакцины үүсгэсэн эсрэг биеийн тоо буурахад мөн гурав дахь тунгаа тариулсан гэж тэрээр хэлсэн юм. Харин түүний хамгийн сүүлд тариулсан буюу долоо дахь вакцин нь томуугийн эсрэг вакцин байжээ.

75 настай Владимир Жириновский энэ талаар "Би жил хагасын дотор зургаан удаа вакцин тариулсан! Би вакцинд хамгийн түрүүнд хамрагдсан! Харин томуугийн вакциныг жил бүр тариулдаг учир тариулсан. Нийт долоон вакцин! Мэдээжийн хэрэг, энэ бол миний хувьд хүнд хэцүү хэрэг байсан. Гэхдээ бид бие биеэ хамгаалах ёстой" хэмээсэн юм.

Түүнчлэн, тэрээр Оросын иргэдийг вакцин тариулахгүй бол энэ өвчнийг зогсоох боломжгүй гэж онцолсон бөгөөд вакцинд хамрагдсанаар "халдвар арилна" гэж мэдэгдсэн байна.

Эх сурвалж: Лента.Ру

---