Төрсөн эцэгтээ хүчиндүүлсэн гэх хоёр настай охины хэргийг цагдаагийн байгууллагаас гэмт хэргийн бүрэлдэхүүнгүй хэмээн хаасан байна. Энэ талаар хохирогч охины ээж болон дуучин Ч.Уранхолбоо нар байр сууриа илэрхийллээ.

Хохирогч охины ээж Ш.Булганням: "Охиноо хүчирхийлэлд өртсөний дараа би охиныхоо сэтгэл санааг нь сайжруулах гэж "Ид шидийн орон" төвд явуулсан ч миний охин дахин хүчирхийлэлд өртсөн байсан. Гэтэл Ч.Ганжавхлан гэдэг хүн одоог хүртэл ямар ч хариу өгөөгүй, тэр багшийг өмгөөлж байсан. Одоо охины минь сэтгэл санаа маш хүнд байна. Энэ хэргийн цаана хууль хяналтын байгууллага хээл хахуульд идэгдсэн гэж хардаж байна. Уг нь хэргийн хөөн хэлэлцэх хугацаа хоёр жил байх ёстой боловч энэ хэргийг одоо надаас нууцаар хаах гэж байгаад би үнэхээр гомдолтой байна. Охиныхоо асуудлыг үнэн зөвөөр шийдүүлэх хүртэл явна" хэмээв.

Дуучин Ч.Уранхолбоо: "Шүүх эмнэлгийн дүгнэлт гарсан байхад хэргийг хаасан нь сэтгэл эмзэглүүлж байна. Мөн энэ хэрэгт ажиллаж байсан өмгөөлөгч нар хэргийг өмгөөлөхөөс татгалзаж байгааг гайхаж байна. Гэхдээ бид хэргийг өмгөөлөх хүнийг олсон. Би хохирогч охины ээжтэй холбогдон энэ хэргийг дуустал хууль, эрхзүйн талаас туслалцаа үзүүлэхээ илэрхийлсэн. Гэвч өмгөөлөгч нартай нь болон хэргийг мөрдөж байгаа мөрдөгчтэй нь холбогдох гээд олон удаагийн оролдлого хийсэн ч утсаа ер авдаггүй. Шүүх эмнэлгийн дүгнэлт болон охинд гарч буй эмгэгүүдийг би нүдээр харсан. Энэ бүхнийг нотлох баримт болгохгүй байгааг гайхаж байна" гэсэн юм.

---