Норвеги улсын Конгсберг хотод нум сумаар зэвсэглэсэн эрэгтэй халдлага үйлдэж таван хүний амийг хороож, хоёр хүнийг шархдуулжээ. Нийслэл Осло хотын баруун урд байдаг Конгсберг хотод халдлага гарсан тухай анхны дуудлага орон нутгийн цагаар 18:13 минутад ирсэн байна.

Халдлага үйлдсэн сэжигтэн Данийн иргэн бөгөөд 37 настай ажээ. Цагдаа нар сэжигтнийг баривчлан саатуулсан байна. Норвегийн Ерөнхий сайд Эрна Солберг аймшигт хэрэг гарсныг мэдэгдэж, "олон хүн айж эмээж байгаа ойлгож байна, цагдаа нар байдлыг хяналтандаа авсан тул эмээх хэрэггүй" гэжээ.

Конгсберг хотын хэвлэлд нийтэлснээр гэмт этгээд Күп Экстра өөртөө үйлчлэх дэлгүүрт халдлага үйлджээ. Гэрчийн ярьснаар сэжигтэн мөрөндөө нум үүрч, гартаа сум барьсан байжээ. Удалгүй дэлгүүрт үймж, үйлчлүүлэгчид зугтааж эхэлсэн бөгөөд тэдний дунд хүүхдээ гартаа тэвэрсэн эмэгтэй ч байсан ажээ.

Хэргийн нотлох баримтыг цуглуулж байгаа тул иргэдийг гэрээсээ аль болох гарахгүй байхыг цагдаа нар уриалсан байна.

Эх сурвалж: ВВС

---