ОХУ-ын Төрийн Думын ээлжит сонгуулиар нийт таван нам сонгогдсон бөгөөд энэ нь тус улсын улс төрийн цар хүрээ өргөжиж байгааг илтгэж байна хэмээн Сонгуулийн ерөнхий хорооны дарга Элла Памфилова мэдээлжээ.

Тэрээр "Энэ бол улс төрийн олон талт байдлын өргөжилт. Төрийн Думд 90-ээд оноос хойш зөвхөн дөрвөн нам байсан бол одоо энэ тоо тав болж нэмэгдсэн гэж хэлж болно" хэмээн тэмдэглэсэн байна.

Түүнчлэн, Парламентад суудалгүй намуудаас нэр дэвшсэн таван бие даасан нэр дэвшигч болон нэг мандаттай тойргийн гурван нэр дэвшигч Төрийн Думд элсжээ.

Суудал авсан таван улс төрийн нам нь Нэгдсэн Орос, Оросын Коммунист Нам, Оросын Либерал-Ардчилсан Нам, Шударга Орос-Үнэний төлөө болон Шинэ хүмүүс нам аж. Харин нэг мандаттай тойрогт ялалт байгуулсан нэр дэвшигчид нь Эх орон, Өсөлтийн нам ба Иргэний платформ намуудад харьяалагддаг аж.

Эх сурвалж: TASS

---