Афганистан улсад энэ жил багадаа нэг сая хүүхэд хоол тэжээлийн дутагдалд орж, өлсгөлөнгийн улмаас амь насаа алдаж ч болзошгүй гэж ЮНИСЕФ буюу НҮБ-ын Хүүхдийн сангаас анхаарууллаа. НҮБ-ын Хүүхдийн сангийн Хенриетта Форе “Афганистан улсад ойролцоогоор 10 сая хүүхдэд хүмүүнлэгийн тусламж нэн шаардлагатай байна” гэдгийг НҮБ-ын сайд нарын түвшний уулзалт дээр хэлжээ.

Тиймээс олон улсын хамтын нийгэмлэг, холбоо, чинээлэг улс орнууд гараа сунган тусламж үзүүлэхийг Форе уриалсан байна.

Талибаны бүлэг Афганистаны төрийн эрхийг булааснаас хойш өрнөдийн өндөр хөгжилтэй ихэнх улс орон Афганистанд үзүүлж байсан шууд тусламжаа царцаагаад байгаа юм. Тэд исламын цэрэг армийг санхүүжүүлж байж болзошгүй хэмээн сэрэмжилсэн.

Энэ жил Афганистан улсад 600,000 орчим хүн дүрвэсэн ба эдгээрийн талаас илүү нь хүүхдүүд байгаа ажээ. АНУ-ын Засгийн газар тус улсад 64 сая ам.долларын хүмүүнлэгийн тусламж нэмж үзүүлэхээр болсон. Мөн НҮБ-ын зүгээс хүнс тэжээлийн хомсдолд ороод буй иргэдэд тэрбум ам.долларын хүмүүнлэгийн тусламж үзүүлэхээ мэдэгдээд байна.

Эх сурвалж: CNN, CNBC

---