БНСУ-д ажиллах хүсэлтэй иргэдийн Солонгос хэлний түвшин тогтоох энгийн шалгалт энэ сарын 1-нээс эхэлсэн. Монгол Улсын Хөдөлмөр, нийгмийн хамгааллын яам, БНСУ-ын Хөдөлмөр эрхлэлт, хөдөлмөрийн яам хоорондын хөдөлмөр эрхлэх зөвшөөрлийн тогтолцооны дагуу БНСУ-д ажилтан илгээх болон хүлээн авах тухай “Харилцан ойлголцлын санамж бичиг”-ийн хэрэгжилтийг хангах зорилгоор БНСУ-д ажиллах хүсэлтэй иргэдийн бүртгэлийг 2021 оны 6 дугаар сарын 29, 30-ны өдөр цахимаар зохион байгуулж, нийт 3469 иргэн бүртгүүлсэн байна.

Эдгээр иргэнээс Солонгос хэлний түвшин тогтоох энгийн шалгалтыг БНСУ-ын аж үйлдвэрийн хүний нөөцийн хэрэг эрхлэх газраас ирүүлсэн хуваарийн дагуу  2021 оны 9 дүгээр сарын 01-нээс 10 дугаар сарын 19 нд ХХҮЕГ-ын байранд өдөрт 4 ээлжээр зохион байгуулж байна.

Уг асуудлаар ХХҮЕГ-ын Ажиллах хүчний шилжилт хөдөлгөөний газрын дарга З.Буянбадрахтай ярилцлаа.

З.Буянбадрах: Шалгалтыг халдвар хамгааллын дэглэмийг өндөр түвшинд ханган зохион байгуулж байгаа бөгөөд хариуг 11 дүгээр сарын 3-ны өдөр зарлана. Мөн БНСУ-д хөдөлмөрийн гэрээгээр ажиллаж байгаад визний хүчинтэй хугацаандаа нутаг буцаж ирсэн, дахин хөдөлмөрийн гэрээгээр ажиллах хүсэлтэй иргэдийн Тусгай шалгалтад 83 иргэн бүртгүүлээд байна. Тусгай шалгалтыг 9 дүгээр сарын 28-ны өдөр зохион байгуулж, хариуг 10 дугаар сарын 20-нд зарлана.

Энгийн болон тусгай шалгалтад тэнцсэн иргэд нь БНСУ-ын Хөдөлмөрийн биржид ажил хайгчийн 2022, 2023 оны нөөцөд орно.

2019 онд шалгалт өгч тэнцсэн БНСУ-ын хөдөлмөрийн биржид ажил хайгчаар байршсан монгол иргэдээс 2020, 2021 онуудад нийт 532 иргэнд  ажлын санал ирж, тэдний 441 иргэнд цахим виз олгогдоод байна.

Дэлхий нийтэд COVID-19 цар тахал тархсантай холбоотой цахим визээ авсан ч явж чадаагүй байгаа эдгээр иргэдийг БНСУ-д илгээхээр БНСУ-ын Хөдөлмөр эрхлэлт хөдөлмөрийн яамны Аж үйлдвэр хүний нөөцийн хэрэг эрхлэх газартай нягт хамтран хоёр тал хүчин чармайлт гарган ажиллаж байгаа.

Ажлын санал хүлээн авсан, цахим виз нь гарсан иргэдийг нэн тэргүүнд явуулахаар ажиллаж байгаа тул нөхцөл байдлыг ойлгох хэрэгтэй. БНСУ-ын талаас 2021 онд 676 иргэнийг ажиллах хүчээр авах санал ирүүлсэн. Өнөөдрийн байдлаар хөдөлмөрийн гэрээтэй 6000 орчим иргэн БНСУ-д ажиллаж байна. БНСУ-ын тал вакцинд хамрагдаагүй иргэнтэй хөдөлмөрийн гэрээ байгуулахгүй гэдгийг анхааруулсан байгаа.

---