Эрүүл мэндийн сайд С.Энхболд ДЭМБ-ын Суурин төлөөлөгчийн орлогч Моника Фонг, ДЭМБ-ын Эрүүл мэндийн ноцтой байдал, гамшгийн асуудал хариуцсан мэргэжилтэн О.Ариунтуяа, ДЭМБ-ын Халдварт өвчин, дархлаажуулалтын асуудал хариуцсан мэргэжилтэн П.Анузаяа, ДЭМБ-ын Халдварт өвчний асуудал хариуцсан мэргэжилтэн Б.Оюундарь нарыг 7 дугаар сарын 23-ны өдөр хүлээн авч уулзжээ.

ДЭМБ-ын суурин төлөөлөгчийн орлогч Моника Монгол улс вакцинжуулалтыг амжилттай хийж, КОВИД-19 халдварын тархалтыг хумих, эмнэлгийн тусламжийг өвчтөний гэрт ойртуулах зохицуулалтыг хийж, эмчилгээг эрт эхэлж, эмчилгээний удирдамжуудыг тогтмол шинэчлэн, шинэ эм ба шинэ аргыг нэвтрүүлэн, маш хүнд үед орны тоог хангалттай тоогоор нэмж, хүндрэл нас баралтаас амжилттай сэргийлж , эм эмийн хэрэгслээр өвчтөнүүдийг үнэ төлбөргүй хангаж байгаа зэрэг нь бүсийн хэмжээнд ихээхэн сайн жишээ болж байгаа гэж Бүсийн захирал Такеши Касай онцолсныг дамжуулсан юм.

Уулзалтаар цаашид орон нутаг руу анхаарал хандуулах, орон нутаг дахь өвчлөл нэмэгдэж байгаа нь Улаанбаатар хотоос орон нутаг руу чиглэсэн хөдөлгөөн улам нэмэгдэх хандлагатай байгаа болон халдвар зөөвөрлөгдөх эрсдэлтэй байгаа талаар санал солилцсон байна. ДЭМБ-ын зүгээс орон нутгийн чадавхыг бэхжүүлэх чиглэлээр хамтран ажиллана гэдгийг онцолжээ.

Түүнчлэн Эрүүл мэндийн сайд С.Энхболд Коронавируст халдвар КОВИД-19 цар тахалтай тэмцэхэд ДЭМБ-аас тогтмол дэмжлэг үзүүлж байгаад талархал илэрхийлсэн юм.

---