Коронавирусийн цар тахлын улмаас дэлхий даяар бараа бүтээгдэхүүний үнэ өсөж байгаа билээ.

Гэхдээ зарим нэгэн зүйлийн үнэ цар тахал эхлэхээс өмнө үетэй харьцуулахад илүү хямд болоод байгаа аж. Тэгвэл АНУ-д 2020 оны 2 дугаар сараас хойш үнэ нь буурсан зүйлсийг танилцуулж байна.

1. Хувцас

"Ковид-19"-ийн тархалтаас хойш хүмүүс гэрээсээ ажиллах нь элбэг болсон бөгөөд үүнийг дагаад ердийн америк хүний хувцасны шүүгээ ч бас өөрчлөгдсөн байна. Оффисын ажилтнууд хослол, даашинзанд баяртай гэж хэлэн, биед эвтэйхэн биеийн тамирын өмд, цамц өмсөх болсон юм.

Үүний улмаас эрэгтэй, эмэгтэйчүүдийн хувцасны үнэ хямдарсан байна. АНУ-д өнгөрсөн оны 2 дугаар сараас хойш эрэгтэйчүүдийн хувцас 7.2 хувиар хямдарсан бол эмэгтэйчүүдийн хувцасны үнэ 5.9 хувиар буурчээ. Түүнчлэн ажлын хослолууд 21.5 хувиар хямдарсан байна.

2. Нийтийн тээвэр

Хөл хориотой холбоотой өөр нэгэн өөрчлөлт бол нийтийн тээврийн ачаалал огцом буурсан явдал юм. Харин одоо вакцинжуулалтын хөтөлбөрийн ачаар иргэд галт тэрэг, автобусаар зорчих нь эргээд хэвийн үзэгдэл болж байгаа билээ. Тэгвэл АНУ-ын хот доторх нийтийн тээврийн үйлчилгээ өнгөрсөн оны 2 дугаар сараас хойш 2.9 хувиар хямдарсан байна.

3. Спортын арга хэмжээнүүд

Спортын арга хэмжээнүүдийн тасалбарын үнэ цар тахлын өмнөх үетэй харьцуулахад 1.8 хувиар хямдарчээ. Хэдийгээр энэ нь том ялгаа биш ч гэсэн ихэнх зүйлийн үнэ өсөж байгаа энэ үед үнийн ялимгүй ялгаа нь том ялалт юм.

4. Гэрийн тэжээвэр амьтан

Цар тахлын үеэр америкчууд ихэнхдээ гэртээ байсан тул гэрийн тэжээвэр амьтад болон тэдэнд зориулсан бүтээгдэхүүнүүдийн эрэлт эрс нэмэгдсэн юм. Гэсэн хэдий ч эдгээр зүйлсийн үнэ нь цар тахлын өмнөх үеийнхээс доогуур байгаа аж.

Гэрийн тэжээвэр амьтан болон хэрэгцээт бүтээгдэхүүний үнэ 2020 оны 2 дугаар сарынхаас 1.8 хувиар хямдарчээ.

5. Эрүүл мэндийн үйлчилгээ

Дэлхий дахиныг хамарсан цар тахлын үеэр эрүүл мэндийн тусламж үйлчилгээ урьд өмнөхөөсөө илүү чухал болсон билээ. Тэгвэл энэхүү үнэт чухал эмнэлгийн тусламж инфляцаас хэрхэн зайлсхийсэн бэ? Өнгөрсөн жил ихэнх иргэд гэртээ, хөл хорионд байсан тул урьдчилан сэргийлэх эмчийн үзлэг болон бусад төрлийн эрүүл мэндийн тусламж үйлчилгээг хойшлуулаад байсан юм.

Коронавирусийн халдвар өргөн тархаж эхэлснээс хойш АНУ-ын эмнэлгийн тусламж үйлчилгээ, эм тариа ба бусад эмнэлгийн хэрэгслийн үнэ 2.3 хувиар хямдарсан байна.

Тодруулбал, жороор болон жоргүй олгодог эмүүдийн үнэ 2.2 хувиар буурсан бол эмнэлгийн тоног төхөөрөмжийн үнэ 5.8 хувиар буурсан нь хамгийн том өөрчлөлт болжээ.

Эх сурвалж: CNN

---