Мексикийн алслагдсан тосгонуудын иргэд коронавирусийн цар тахлын эсрэг вакциныг тариулахаас татгалзан, халдварын тархалтын эрсдэлийг нэмэгдүүлж байна.

Одоогийн байдлаар тус улсын нийт хүн амын бараг 30 хувь нь вакцины нэг тунгаа тариулаад байгаа юм. Гэвч Чиапас, Кокилтил зэрэг уугуул иргэдийн амьдардаг мужуудад дархлаажуулалтын явц дөнгөж 2 хувьтай явж байгаа аж. 

Жишээлбэл, Чилон хотын оршин суугчид нь ихэвчлэн Майячуудын үр удам болох уугуул иргэд юм. Эдгээр уугуул иргэдийн ихэнх нь Засгийн газарт итгэдэггүй бөгөөд эрх баригчдын сурталчилж байгаа вакцинжуулалтад ч мөн эргэлзээтэй хандаж байгаа аж.

Түүнчлэн олон нийтийн сүлжээгээр тархаж байгаа худал мэдээллүүд уугуул иргэдийн шийдвэрт ихээхэн нөлөөлж байгаа гэнэ. Коронавирусийн вакцин тариулсан хүмүүс хоёр жилийн дараа амиа алдана гэх цуурхал гараад байгаа төдийгүй вакцинжуулалтын хөтөлбөр нь хүн амаа цөөрүүлэх гэсэн Засгийн газрын төлөвлөгөө зэрэг ташаа мэдээлэл иргэдийн дунд өргөн тархаад байгаа аж. Зарим уугуул иргэд түүнчлэн вакциныг чөтгөрийн хараалтай гэж үздэг байна.

Тэгвэл Мексикийн Ерөнхийлөгч Андрес Мануэль Лопес Обрадор өнгөрсөн долоо хоногт Чиапас дахь вакцинжуулалтын түвшин бага байгаа талаар дурдаад, Засгийн газар илүү их зүйл хийх шаардлагатай байгааг мэдэгдсэн юм. Харин орон нутгийн эрүүл мэндийн мэргэжилтнүүд эрх баригчдыг хэтэрхий амархан бууж өгсөн гэж үзэж байна.

Эх сурвалж: BBC

---