Улсын Онцгой комиссоос өчигдөр Үндэсний баяр наадмыг хойшлуулах санал гаргаж буйгаа зарласан. Засгийн газар өнөөдөр ээлжит бусаар хуралдаж, энэ саналыг хэлэлцэн, гаргасан шийдвэрээ танилцуулж байна.

Ерөнхий сайдын Хэвлэлийн төлөөлөгч Ч.Болортуяа "Засгийн газрын ээлжит бус хуралдаан өндөрлөлөө. Нийт зургаан асуудал хэлэлцсэн. Голлох шийдвэрийг танилцуулъя. 

Тухайлбал, Үндэсний их баяр наадмыг нэг жилээр хойшлуулах шийдвэр гаргалаа. Өмнө нь наадмыг үзэгчгүйгээр зохион байгуулахаар төлөвлөж байсан ч ЭМЯ болон Эрдэмтдийн зөвлөлийн дүгнэлтээр наадам зохион байгуулбал 3,000 орчим хүн халдвар авах магадлалтай байгааг танилцуулсан. Иймд УОК-оос өчигдөр наадмыг хойшлуулах эсвэл цуцлах санал гаргасан.

Коронавируст халдварын тархалт нэмэгдэж, нөхцөл байдал хүндэрч байгаатай холбогдуулан Тулгар төрийн 2230, Их Монгол Улсын 815, Ардын хувьсгалын 100 жилийн ой, Үндэсний их баяр наадмыг улсын хэмжээнд нэг жилээр хойшлууллаа.

Мөн аймаг, сумдын баяр наадам, хурдан морины бүсийн уралдаан, уул овооны тахилга, ой тэмдэглэх зэрэг нийтийг хамарсан арга хэмжээ зохион байгуулахгүй байхыг бүх шатны Засаг дарга нарт үүрэг болгов.

Коронавируст халдварын цар тахлаас урьдчилан сэргийлэх, эрсдэлийг бууруулах зорилгоор Монгол-Оросын хилийн Алтанбулаг автозамын боомтоор улсын хил нэвтрэх зорчигч тээврийн хөдөлгөөнийг 2021 оны долдугаар сарын 7-ны өдрөөс 2021 оны долдугаар сарын 31-ний өдрийг дуустал түр зогсоохоор Засгийн газрын ээлжит бус хуралдаанаас шийдвэрлэлээ.

Эрүүл мэндийн сайд С.Энхболд: Цахим наадмын төсөв хөрөнгө мөнгийг эрүүл мэндийн салбарт зарцуулна. Уг наадамтай холбоотой бэлтгэл ажлын бүрэлдэхүүн Хүй долоо худагт ажилласан байсан. Уг иргэдийн биеийн байдлыг цаашид ажиглана. Эрүүл мэндийн яамнаас Хүй долоо худагт ажиллаж байсан наадмын бие бүрэлдэхүүнд 2500 ширхэг түргэвчилсэн оношлуур, хамгаалах хувцас зэргээр хангасан байсан. 

Соёлын сайд Ч.Номин: Үндэсний их баяр наадмыг тэмдэглэх төсөв нийслэлээс гардаг. Энэ жилийн хувьд 3.5 тэрбум төгрөгийг наадамд зарцуулахаар шийдвэрлэсэн байсан. Уг төсвийн дөрөвний нэгийг соёл урлагийн арга хэмжээнд зарцуулахаар тусгасан байсан. Наадам тэмдэглэнэ гэх шийдвэр гарсантай холбоотойгоор бэлтгэл ажлыг хийж байсан. Нээлт хаалтын соёл урлагийн арга хэмжээний контент хийгдээд явж байгаа. Одоогоор хэдэн төгрөг зарцуулсныг нийслэлээс гаргаж өгнө. 

Үндэсний их баяр наадам буюу энэ сарын 10-18-ныг дуустал нийт 9 хоног амрах Засгийн газрын шийдвэр хэвээрээ гэдгийг дурдлаа. 

---