БЗД-ийн 20-р хороо буюу Цагдуулын аманд байрлах малчин айлуудыг хаус хороолол барих учраас нүүх шаардлагыг тус дүүргийн 23 дугаар хорооноос шаардсан байна.

2017 оноос нийслэлийн бүс нутагт малчин айл өрхүүдийг байршуулахгүй байх шийдвэр гарч Цагдуулын аманд малтай айл өрхүүдийг нүүж, амьдарч болно хэмээсэн юм. Тус аманд өнөөдрийн байдлаар 10 гаруй малтай 20 гаруй айл өрх суурьшиж байна.

Айл өрхүүдийн хувьд тэтгэвэртэй гарсан өндөр настангууд суурьшин амьдардаг бөгөөд энэ газарт хаус, хороолол барих тул тэднийг нүүхийг шаарджээ. Малчдын хувьд асуудлаа хаашаа хандахаа мэдэхгүй, хэцүү байдалд ороод байгаа тул манай LIVETV хандсан юм.

Түүнчлэн мал хариулах заасан газраас өөр газар мал нь бэлчсэн тохиолдолд малыг нь “журмын хашаа” гэх зүйлд аваачин хашиж, бог малаас 50 мянган төгрөг, бод малаас 30 мянган төгрөг хураан авсны эцэст эзэнд өгдөг байна. Иймд малчдын хувьд малаа тааваараа бэлчээж чадахгүй, өдөр бүр малаа хариулж байгааг дурдлаа.

Энд амьдардаг малтай тэтгэврийн хөгшчүүлийг малыг нь бэлчээхгүй, дээрээс нь нүү гээд дарамталж байна гэлээ. Урьд хөөж туухаар нь телевиз дуудсан дараа нь Баянзүрх дүүргийн 23 дугаар хорооны Засаг дарга “Нүүх зардлыг нь төлнө. Майхны ам руу нүү гэсэн”. Гэтэл Майхны амыг иргэдэд цахимаар өмчлүүлсэн. Буулаа гэхэд нэг өдөр өмчилж авсан иргэд нь ирээд хөөж тууна.

Түүнчлэн 23 дугаар хорооны Засаг дарга “Тухайн үед Ардчилсан нам Засаг барьж байсан. Одоо бол МАН засаг барьж байгаа учраас та бүхэн нүүх ёстой” хэмээн хөөж байгаа утгатай зүйл ярьсан. Ер нь бол нэг мөнгөтэй нөхөр энд байшин барих гээд малчдыг хөөж байна гэж ойлгож байна хэмээн Цагдуулын аманд оршин суудаг иргэд ярилаа.

---