Монголын Үйлдвэрчний эвлэлийн холбоо, Монголын эрүүл мэндийн ажилтны үйлдвэрчний эвлэлийн холбооноос УИХ, Засгийн газарт хандан мэдэгдэл гаргаад буй. Үүнд:

• Эрүүл мэндийн салбарын ажилтнуудын цалин хөлсийг хоёр дахин нэмэгдүүлэх
• Халдварын голомтод ажиллаж байгаа эмч, ажилчдыг эрсдэлийн даатгалд хамруулах
• Эрүүл мэндийн тухай хуулийн 30.1, 30.2 заалтуудыг халдварын голомтод ажиллаж байгаа эрүүл мэндийн эмч, ажилтанд ажиллуулсан байгууллага үндсэн цалинг гурав дахин нэмж олгох хуулийн заалтыг хэрэгжүүлэх
• Ажил үүргээ гүйцэтгэж яваад халдвар авсан ажилтнуудад нөхөн олговор олгох  тухай тусгажээ.

Уг шаардлагын талаар МҮЭХ-ны дэд ерөнхийлөгч С.Эрдэнэбат, Монголын Эрүүл мэндийн ажилтны үйлдвэрчний эвлэлийн дарга Х.Ариунаа нартай ярилцлаа.

МҮЭХ-ны дэд ерөнхийлөгч С.Эрдэнэбат: Өнөөдрийн байдлаар халдвар бүртгэгдээгүй бүс нутаг байхгүй байна. Эрүүл мэндийн салбарын ажилтнууд маань жил гаруй уг цар тахалтай тэмцэж байна. Өнөөдрийн байдлаар тэд цөхөрч, ядарч байна. Хуулиараа цар тахалтай тэмцэж байгаа эмч, эмнэлгийн ажилтны цалин, урамшууллыг 2-3 дахин нэмэгдүүлэх ёстой байтал уг хуулийн хэрэгжилт хангалтгүй байна. Өдөр бүр нэг эмч, сувилагчид ногдох өвчтөний тоо нэмэгдэж, цаашлаад эмч, эмнэлгийн ажилтнууд өөрсдөө халдвар авч байна. Эрүүл мэндийн салбарын ажилтнуудад онцгой анхаарал хандуулахгүй бол хүний нөөцийн дутагдалд орох эрсдэлтэй байна. УОК, Засгийн газраас хөл хориог бүхэлд нь биш хэсэгчлэн тогтоох хэрэгтэй. Цаашлаад аж ахуйн нэгж, иргэдэд өгөх дэмжлэг тусламжаа онож, олгох хэрэгтэй.

Монголын Эрүүл мэндийн ажилтны үйлдвэрчний эвлэлийн дарга Х.Ариунаа: Эрүүл мэндийн салбарын 56 ажилтнууд сүүлийн хоёр жил 24 цагаар тасралтгүй ажиллаж байна. Гэвч тэдний нийгмийн асуудлыг шийдсэнгүй. Сүүлдээ эрүүл мэндийн салбарын ажилтнууд маань өвдөж байгаа нь бэлтгэгдсэн хүний нөөцийн холдолт орж байна.

Цаашлаад илүү цагийн урамшуулал, цалин хөлсийг нь дутуу бодох, өөрсдөө өвдсөн тохиолдолд ямар ч цалин байхгүй гэртээ өөрсдийгөө эмчилж байна. Цар тахлын голомтод ажиллаж буй эмч нарын цалинг 3 дахин нэмэгдүүлж олгоно гэсэн хуулийн заалт хэрэгжихгүй байна.

1500 гаруй эмнэлгийн ажилтнууд коронавирусийн халдвараар өвдөөд байна. Эрүүл мэндийн салбарын ажилтнуудын цалин, урамшууллыг ижил тэгш олгохгүй бол ажил хаяхаа эхнээсээ мэдэгдээд байгаа.

---