Өмнөд Солонгосын нийслэл Сөүл хотын Доод шатны шүүхээс "Зам буруу зааж өгсөн" гэх шалтгаанаар гадаадын харьяалалтай хоёр эмэгтэйг хүчирхийлсэн этгээдэд нэг жилийн хорих ял оноосон бөгөөд Давж заалдах шатны шүүхээс уг тогтоолыг хэвээр үлдээсэн байна.

Хэргийг тодруулбал, 40 орчим насны уг эрэгтэй нь өнгөрсөн оны 6 дугаар сарын 6-ны өдрийн 18:00 цагийн орчимд Сөүлийн Сочо дүүрэгт алхаж явсан хоёр эмэгтэйг хэл амаар доромжлон, бие махбодод нь халдсан аж. Тэрээр эмэгтэйчүүдийг өөрт нь буруу зам зааж өгсөн хэмээн буруутгаж, тэдэн рүү гялгар ууттай лаазалсан ундаанууд шидэн, "Надад худлаа хэллээ" хэмээн харааж зүхсэн байна.

Хууль хяналтынхан түүнийг мөн өнгөрсөн оны 8 дугаар сарын 29-ний өдрийн 22:30 цагийн орчимд тус дүүргийн нэгэн уушны газрын ажилтанд халдсан хэрэгт нэмж буруутгажээ. Тэрээр тус газраар үйлчлүүлж байсан гадаад эмэгтэйчүүдийн амар амгалан байдлыг алдагдуулж байсан бөгөөд нэг ажилтан түүнийг болихыг хүсэхэд тэрээр уг ажилтны биед халдсан аж.

Хэрэгтэн эрэгтэй нь 2010 оноос хойш долоон удаагийн танхайн хэргээр ял эдэлж байсан бөгөөд 2019 оны 11 дүгээр сард шоронгоос суллагдаад байжээ. Тэрээр үүнээс хойш жил хүрэхгүй хугацаанд дахин гэмт хэрэг үйлдсэн тул орон нутгийн шүүхээс түүнд нэг жилийн хорих ял оноосон байна.

Эх сурвалж: The Korea Times

---