ТЦА-ны Урьдчилан сэргийлэх хэлтсийн мэргэжилтэн, цагдаагийн ахмад Б.Зоригоо: Эцэг, эхийн хараа хяналтгүй байдлаас үүдэн бага насны хүүхэд зам тээврийн осолд өртсөөр байна. 

Монгол улсын хэмжээнд 2011-2020 оны байдлаар хүүхэд өртсөн нийт 9779 осол бүртгэгдэж,  10,332 хүүхэд зам тээврийн осолд өртөж, 9874 хүүхэд буюу 95,7 хувь нь гэмтэж, 485 хүүхэд буюу 4,7 хувь амь хохирсон байна.

Нийт ослын 8,358 буюу 85 хувь, гэмтсэн хүүхдүүдийн 8,699 буюу 88 хувь нь нийслэлд бүртгэгдсэн бол амь хохирсон хүүхдүүдийн 386 буюу 80 хувь нь орон нутагт бүртгэгдсэн байна.

Өнгөрөгч онд улсын хэмжээнд 625 хүүхэд зам тээврийн осолд өртөж, 64 хүүхэд амь насаа алдсаны 23 хүүхэд нь авто зам бус өөрсдийн амьдардаг хороолол, хашаандаа тоглож байх үед нь эцэг эх, асран хамгаалагч нар хөдөлгөөн эхлэхээсээ өмнө орчноо шалгаагүйн улмаас, 30 хүүхэд нь зорчигч хэлбэрээр хөдөлгөөнд оролцох үедээ буюу тээврийн хэрэгсэлд буруу тээвэрлэсний улмаас осолд өртөж амь хохирсон байна.

Энэ оны эхний 4 сарын байдлаар хүүхэд өртсөн осол, хэрэг 69 бүртгэгдэж, хэргийн улмаас 11 хүүхэд нас барж, 56 хүүхэд хүнд, хүндэвтэр гэмтэл авсан байна.

Энэ нь шууд эцэг, эх насанд хүрэгчдийн хариуцлага, анхаарал болгоомжгүй байдлаас үүдэлтэй ослууд юм. 10 хүртэлх насны хүүхдийг замын хөдөлгөөнд харгалзах хүнгүйгээр оролцуулсны улмаас тухайн хүүхэд зам тээврийн осолд өртсөн тохиолдолд эцэг, эх асран хамгаалагчийг Зөрчлийн тухай хуулиар 50 нэгжээр торгодог. Өнгөрсөн жил 100 гаруй эцэг, эхэд хариуцлага тооцсон байдаг. 

Тээврийн цагдаагийн албанаас жил бүр Олон улсын хүүхдийн эрхийг хамгаалах өдрийг угтаж “Бяцхан зорчигч” аяныг өрнүүлдэг билээ. Энэ жилийн хувьд бид ЭМЯ-тай хамтран “Хүүхдэд ээлтэй жолооч” аяныг нэг сарын хугацаатай Улсын хэмжээнд зохион байгуулахаар ажиллаж байна. Арав хүртэлх насны хүүхдийг хараа хяналтгүй хөдөлгөөнд оролцуулахыг байхыг анхааруулж байна. 

---