Сүхбаатар дүүргийн эрүүгийн хэргийн анхан шатны шүүхийн шүүгч Х.Идэр болон Булган аймгийн шүүхийн шүүгч Д.Отгонбаатар нарыг огцруулах шийдвэрийг өчигдөр Шүүхийн ёс зүйн хорооноос гаргасан.

Уг шийдвэрийн дагуу Сүхбаатар дүүргийн эрүүгийн хэргийн анхан шатны шүүхийн Тамгын газартай утсаар холбогдож, “Х.Идэр шүүгч ажлаа хийж байгаа юу, үгүй юу” гэдгийг тодруулахад “Шүүгчийг томилж чөлөөлөх бүрэн эрх гагцхүү Монгол Улсын Ерөнхийлөгчид хадгалагддаг. Мөн огцорсон шүүгч нар Шүүхийн ёс зүйн хорооны шийдвэрийг давж заалдах эрх нь ч нээлттэй байгаа. Тиймээс дээрх шүүгч нар Монгол Улсын Ерөнхийлөгч огцруулсан зарлиг гаргах хүртэлх хугацаанд шүүн таслах ажлаа хэвийн явуулах байх. Шүүхийн ёс зүйн хорооноос шүүгч нарыг огцруулах шийдвэр гаргасны дараа ямар процесс үргэлжлэхийг бид бүхэн хууль журмаас шүүрдэн үзэж байна. Өнөөдөр бүх нийтийн амралтын өдөр учраас манай байгууллага ажиллаагүй” гэх хариуг өглөө.

Шүүхийн ёс зүйн хорооны дүрмийн 5.16-д заасны дагуу “Шүүгчид албан тушаалаас огцруулах сахилгын шийтгэл ногдуулсан бол Ёс зүйн хороо шийдвэрийг Шүүхийн ерөнхий зөвлөлд хүргүүлнэ. Уг шийдвэрийг Шүүхийн ерөнхий зөвлөл Монгол Улсын Ерөнхийлөгчид өргөн мэдүүлж огцруулдаг процесстой юм байна. Хэрвээ дээрх хоёр шүүгч Шүүхийн ёс зүйн хорооны шийдвэрийг эсэргүүцэж Захиргааны хэргийн давж заалдах шатны шүүхэд гомдол гаргасан тохиолдолд дор хаяж хоёр сараас хоёр жилийн турш уг асуудал сунжирч болох талтай. Тэгэхээр шүүх, шүүгчийн нэр хүндэд ноцтой хохирол учруулахуйц ёс зүйн зөрчил гаргасан гэх үндэслэлээр огцорсон шүүгч Х.Идэр, Д.Отгонбаатар нар хоёр сараас хоёр жилийн турш шүүн таслах ажил хийж магадгүй байна.

---