Өмнөд Солонгосын "LG Uplus" корпорац "2G" сүлжээний үйлчилгээгээ ирэх 6 дугаар сарын эцэс гэхэд зогсоох төлөвлөгөөтэй байгаа бөгөөд тус улсын Мэдээлэл, харилцаа холбооны технологийн яамнаас өнөөдөр зөвшөөрөл олгожээ. Ингэснээр тус улсын хуучин харилцаа холбооны сүлжээ бүхэлдээ эцэс болох юм.

БНСУ-ын гурав дахь том үүрэн телефоны оператор болох "LG Uplus" нь ирэх 6 дугаар сарын 11-нээс эхлэн "2G" сүлжээгээ тэр чигээр нь хааж эхлэх аж. Тэгвэл тус улсын хамгийн том утасгүй технологийн үйлчилгээ үзүүлэгч "SK Telecom" компани нь өнгөрсөн оны 7 дугаар сард "2G" үйлчилгээгээ эцэс болгосон бол өрсөлдөгч "KT" корпорац нь мөн адил шийдвэрийг 2012 онд гаргаж байжээ.

"LG Uplus" компани "2G" сүлжээний салбараас гарснаар Өмнөд Солонгост анх 1997 онд нэвтэрч байсан харилцаа холбооны сүлжээний төгсгөл ирж байгаа юм. Тус компани нь одоогийн "2G" хэрэглэгчдээ "LTE" эсвэл "5G" үйлчилгээнд шилжүүлж, ухаалаг гар утасны төхөөрөмж болон үйлчилгээний нөхцөлүүдийн тусламж үзүүлнэ гэжээ. Энэ 5 дугаар сарын байдлаар тус компанид 140 мянган "2G" хэрэглэгч бүртгэлтэй байгаа аж.

Тус улсын харилцаа холбооны компаниуд "5G" сүлжээний үйлчилгээгээ өргөжүүлэхийн тулд "2G" сүлжээгээ цуцалж байгаа билээ. Энэ оны 3 дугаар сарын сүүлчийн байдлаар Өмнөд Солонгосын "5G" сүлжээний хэрэглэгчийн тоо 14.48 саяд хүрсэн бөгөөд энэ нь тус улсын нийт 71.1 сая гар утасны хэрэглээний 20 хувийг эзэлж байгаа юм.

Эх сурвалж: Yonhap News Agency

---