ОХУ-ын "ВКонтакте" олон нийтийн сүлжээ болон "Телеграм" мессенжерийн платформыг үүсгэн байгуулагч Павел Дуров АНУ-ын "Apple" брэндийн технологийг шүүмжлэн, "iPhone" ухаалаг гар утасны хэрэглэгчдийг "дижитал боолууд" хэмээн нэрлэжээ.

Түүний үзэж буйгаар "Apple" компани хэрэглэгчдэдээ хуучин загварын төхөөрөмжүүдээ хэт өндөр үнээр зардаг байна. Мөн тус компанийн бүтээгдэхүүнүүд нь "App Store", "iCloud" зэрэг зөвхөн өөрийнх нь үйлчилгээтэй нийцдэг болох нь том сул тал гэж тэмдэглэжээ.

Павел Дуров өнгөрөгч лхагва гарагт өөрийн "Телеграм" хуудаснаа "Би "iPhone" ашиглан аппликейшнийхаа туршилтыг хийх бүртээ дундад зууны үед ирсэн юм шиг санагддаг. "iPhone"-ийг хэрэглэснээр та "Apple"-ийн дижитал боол болох болно" хэмээн бичжээ.

Өмнө нь тэрээр мэдээллийн урсгалыг илүү нээлттэй болгохын тулд хэрэглэгчдийг "Android" үйлдлийн системд шилжихийг уриалж байсан билээ. Харин "Apple" брэндийн "iOS" үйлдлийн систем нь иргэдийн ашигладаг программуудад бүрэн хязгаарлалт тавьж чадна гэж Дуров анхааруулж байсан юм.

Эх сурвалж: Известия

---