Бага мөнгөтэй хүмүүс л комиссоос хувцасладаг гэсэн ойлголтыг дэлхийн хэмжээний одууд хүртэл эвдээд буй. Хувцас хямдрах тутам түүнийг нэг удаагийн хэрэглээ гэж үздэг хүний тоо нэмэгдсэн хэрэг. Хуучин хувцас нь хямд үнэтэй “комиссын бараа” гэдэг ойлголтоос ялгаатай бөгөөд байгаль орчноо хамгаалж буй ухаалаг сонголт гэдгийг “Тойрог” дэлгүүрийн үүсгэн байгуулагч Агнууш дурдсан юм.

Тэрбээр Номи хэмээх найзтайгаа хамтран Toirog thrift shop нээгээд 8 сар болж байгаа бөгөөд хүмүүс өөрсдийн шинэ болон хуучин хувцас, гоёл чимэглэлээ өгч бусдад худалдаалах боломжийг олгож байна.

Дэлгүүрийнхээ нэрийг “ТOIROГ” гэж нэрлэсэн нь хүн шинэ хувцас аваад хуучирхаар нь шатаах юм уу хаяхаас нь өмнө бид дахин эргэлтэд оруулж өөр эзэнтэй болгож байгаатай холбоотой.

Би чинь гэрэл зурагчин, харин Номи архитектур мэргэжилтэй учраас бид хоёр маркетинг, эсвэл бизнес яаж авч явах талаар туршлага байхгүй, ер нь мэдэхгүй л дээ.

Дэлхийн алдартай хувцасны брендүүд нэг жилд бүхэл бүтэн 27 коллекци гаргаж “fast fashion” буюу маш хямд үнээр массаар нь хувцас үйлдвэрлэдэг. Үүнээс болж хувцасны эдэлгээ асар богинохон болж тэр нь эргээгээд байгальд хэдэн мянгаараа хог хаягдал үүсгэдэг. Тэгэхээр бид хоёрын зорилго бизнес хийхээс илүүтэйгээр зөв соёл, хандлагыг түгээх, байгаль экологио хайрлах, түүний үнэ цэнийг бусдад ойлгуулах ажил үйл гэж харсан учраас “ТОIROГ”-ийг эхлүүлсэн.

Манай Монголчууд хуучин хувцас эсвэл “комисс” гэхээр хүний энергийг авна, өөрийнхөө энергийг өгнө гэдэг буруу ойлголттой байдаг. Гэтэл бодит байдал дээр ганцхан жинсэн өмд үйлдвэрлэхийн тулд нэг хүний 10 жилийн усны хэрэглээг зарцуулдаг бол ганц даавуун пудволкийг хийхэд нэг хүний 7.5 жилийн усны хэрэглээтэй тэнцэхүйц ус зарцуулдаг гээд бодохоор гунигтай байгаа биз дээ.

Бид хоёр дэлгүүр нээхдээ эхний жилдээ ашиггүй ажилласан ч хамаагүй гэж бодож байсан. Гэтэл дэлгүүрээ нээсэн чинь маш их хүн орж ирээд хүмүүсийн сонирхолыг татсан нь бидэнд урам өгсөн.

Залуучууд маань байгаль орчноо хамгаалах, дахин боловсруулах талаарх мэдлэг ойлголт нэмэгдэж байна. Манай дэлгүүрийн хувцас бусад зүйлсийн 80 хувь нь үйлчлүүлэгч нараас ирдэг. Зарим хүмүүс хэн нэгэнд үнэгүй хувцасаа өгмөөр байвал манай дэлгүүрийн “үнэгүй” сагсанд байршуулж болно.

Түүнчлэн тус дэлгүүрт 15-20 залуус өөрсдийн урласан гар бүтээлээ худалдан борлуулдаг байна.

Манайхаар үйлчлүүлсэн залуусын худалдан авсан зүйлсийг бид хаягдал сониноор боож өгдөг. Ерөнхийдөө ямар ч хог хаягдалгүй байхыг хичээдэг. Манай дэлгүүрт ирж байгаа 16, 17 настай хүүхдүүд энэ соёлыг сурчих юм бол 10, 20 жилийн дараа хүүхдүүддээ үлгэрлэж заана шүү дээ. Энэ бол орчин үеийн ухаалаг, байгаль эх дэлхийдээ ээлтэй ухамсартай залуусын хийдэг сонголт шүү гэдгийг л хойч үедээ дэлгүүрээрээ дамжуулж ойлгуулахыг бид хүсэж байна.

---