Эрчим хүчний сайд Н.Тавинбэх Засгийн газрын хуралдааны үеэр эрчим хүчний салбарт шаардлагатай шинэчлэл болон түүнд шаардлагатай төсвийн талаар танилцууллаа.

Тэрээр "Хотын дулаан дамжуулах шугамын 24 хувь нь хуучирсан байна. Энэ нь иргэдийн амьдралд эрсдэл учрах аюултай. Хотын цахилгаан эрчим хүчний хэрэглээ сүүлийн таван жил дунджаар 6-8 хувиар нэмэгдсэн.

Хотын хэрэглэгчдийг хангаж буй дамжуулах түгээх сүлжээний нийт шугамын 31 хувь буюу 815 дэд станц, цахилгаан дамжуулах агаарын болон кабель шугамын 26 хувь буюу 3488 км урт цахилгаан дамжуулах агаарын шугамын ашиглалтын хугацаа дуусч нэн яаралтай шинэчлэл хийх шаардлагатай байна.

Тоноглолын насжилт хэтэрсэн, хэт өндөр ачаалал нэмэгдсэнтэй холбоотойгоор 2020 онд түгээх сүлжээнд 285 тасралт гарч, давхардсан тоогоор 306 мянган хэрэглэгчийн цахилгаан нэг цаг түүнээс дээш хугацаагаар доголдсон.  

Улаанбаатар хотын эрчим хүчний хангамжийн өсөн нэмэгдэж буй хэрэглээг хангах, цахилгаан, дулаан хангамжийг системүүдэд хийгдэх өргөтгөл, шинэчлэлтийн төсөл арга хэмжээнд урьдчилсан байдлаар 3.484.1 тэрбум төгрөг шаардлагатай байна" гэсэн юм.

 

---