Улсын хэмжээнд коронавирусийн халдварын 1015 тохиолдол бүртгэгдэж, халдвар авсан хүний тоо 40396 боллоо.

Энэ сарын 26-ны өдөр Энэтхэг Улаанбаатарын онгоцоор ирсэн Энэтхэг улсын 16 иргэн коронавирусийн халдвар авсныг хоёр дахь шинжилгээгээр тогтоожээ. Энэ хүмүүс Дорноговь аймагт тусгаарлагдан эмчлүүлж байна.

Өмнө нь буюу дөрөвдүгээр сарын 30-нд мөн Дорноговь аймгийн Алтанширээт суманд газрын тос боловсруулах бүтээн байгуулалтын ажилд оролцохоор ирсэн тэдгээр энэтхэг мэргэжилтнүүдийн 19-өөс нь коронавирусийн халдвар илэрсэн юм. Ийн нефтийн үйлдвэрийн бүтээн байгуулалтад оролцохоор ирсэн 60 иргэний 35-аас нь халдвар бүртгэгдээд байна. 

Сануулахад, 2021 оны дөрөвдүгээр сарын 25-26-нд шилжих шөнө Нью-Дели-Улаанбаатар чиглэлийн онгоцоор 72 хүн Монголд ирсэн бөгөөд тэдний 11 нь Монгол Улсын иргэд байсан бол бусад нь Монголд ажиллахаар ирсэн Энэтхэгийн мэргэжилтнүүд байсан юм. Тус нислэгээр ирсэн Энэтхэг улсын 60 иргэн нарийн мэргэжлийн инженер, техникийн ажилчид бөгөөд Дорноговь аймгийн Алтанширээт суманд газрын тос боловсруулах бүтээн байгуулалтын ажилд оролцох үүрэгтэй ирсэн юм. Энэтхэгээс ирсэн ажиллах хүчнийг Дорноговь аймгийн Алтанширээтэд тусгаарласан бөгөөд бүгд вакцины хоёр дахь тунд хамрагдсан, PCR шинжилгээтэй байсан тухай УОК-ын Шуурхай штабаас мэдэгдэж байсан юм. 

---