Колумби улсын Засгийн газраас боловсруулсан татварын шинэчлэлийн саналыг эсэргүүцсэн олон мянган иргэн гудамжинд жагсан, эсэргүүцлийн хөдөлгөөнийг эрчимжүүлж байна.

Тус улсын томоохон үйлдвэрчний эвлэлүүд иргэдийг уриалсны дараа ийнхүү улс орон даяар өргөн хэмжээний жагсаал өрнөсөн байна. Уг жагсаалын үеэр үүссэн үймээн самууны улмаас 42 цагдаагийн алба хаагч гэмтэж бэртэн, 40 иргэнийг баривчилсан гэж албаныхан мэдээлжээ. Зарим томоохон хотын цагдаа нар нулимс асгаруулагч хий ашигласан байна.

Богота хотод 31 цагдаа болон энгийн иргэд шархадсан гэж хотын захирагчийн албанаас мэдээлжээ. Кали хотын иргэд хэд хэдэн автобус шатаасны дараа хотын захиргаанаас цэрэг армийг байрлуулан, 13:00 цагаас хойш хөл хорио тогтоосон байна.

Харин орон нутгийн үйлдвэрчний эвлэлүүдийн удирдагчдын зүгээс эсэргүүцлийн жагсаал цуглааныг үргэлжлүүлэхийг уриалж, ирэх 5 дугаар сарын 19-ний өдөр дахин нэгдэн жагсана гэдгээ зарласан юм.

Тус улсын Ерөнхийлөгч Иван Дюкийн Засгийн газраас дэвшүүлсэн татварын шинэчлэлийн хүрээнд хувь хүн, аж ахуйн нэгжийн татварыг нэмэгдүүлж, олон төрлийн хөнгөлөлтийг арилгах аж. Эрх баригчид үүний үр дүнд 6 тэрбум ам.доллар буюу Колумбийн дотоодын нийт бүтээгдэхүүний 2 хувьтай тэнцэх хэмжээний мөнгийг босгохоор төлөвлөж байгаа юм. Албаныхан түүнчлэн нэмэгдсэн өртгийн албан татварт хамрагдах бараа бүтээгдэхүүний зүйлийг өргөжүүлэхийг санал болгосон аж.

Эх сурвалж: Reuters

---