Чили улсын хойд хэсгийн хоёр малын эмч нохойд зориулсан коронавирусийн вакциныг хүмүүст тарьж байсан нь ил болсон бөгөөд орон нутгийн эрүүл мэндийн удирдлагууд тэднийг торгосон байна.

Тус улсын Калама хотын Мария Фернанда Мунозын мал эмнэлгийн ажилтнууд амны хаалт зүүхгүй байсан бөгөөд аль хэдийн коронавирусийн вакцин хийлгэсэн гэж мэдүүлжээ. Энэхүү мэдээллийг хүлээж авсан Антофагаста мужийн Эрүүл мэндийн нарийн бичгийн даргын орлогч Роксана Диаз агентлагийнхаа алба хаагчдыг илгээн, шалгалт хийлгэсэн байна.

Ингээд Муноз өөртөө болон ажилтнууддаа нохойд зориулсан коронавирусийн эсрэг вакциныг тарьсан гэдгээ хүлээн зөвшөөрсөн бөгөөд огт өвдөөгүй хэмээн мэдэгджээ. Энэхүү явдал нь өнгөрсөн онд болсон бөгөөд тухайн үед Чили улсад цар тахлын эсрэг нэг ч вакцин батлагдаагүй байсан юм.

Роксана Диаз энэ талаар "Хэрвээ үнэн бол энэ маш аюултай хэрэг. Хүнд нохойн вакцин тарих нь олон төрлийн сөрөг үр нөлөөтэй байна гэх судалгаа байдаг. Гэвч үүнийг клиник туршилтаар судалж үзэх нь ёс зүйгүй үйлдэл учир бодит дүгнэлт байхгүй" хэмээн тэмдэглэжээ.

Албаныхны хэлснээр орон нутгийн өөр нэгэн малын эмч Карлос Пардо мөн нохойд зориулсан вакциныг хүнд тарихыг сурталчилж байжээ. Чилийн Эрүүл мэндийн газраас Пардог 9,200 орчим ам.доллароор торгосон бол Мунозыг 10,300 орчим ам.доллароор торгосон байна. Тэд хоёулаа давж заалдах шатны шүүхэд хандсан аж.

Одоогийн байдлаар Чили улсын нийт 19 сая хүн амын 7.7 сая иргэн нь коронавирусийн эсрэг вакцины эхний тунгаа тариулаад байгаа юм.

Эх сурвалж: AP

---