ҮХЦ-ийн дунд суудлын хуралдаан 4-р сарын 16-нд буюу нөгөөдөр болно. Уг асуудлаар бид хуульч Б.Мөнхзаяагаас дараах тодруулгыг авлаа. 

Хуульч Б.Мөнхзаяа: 

-Нэр бүхий хүмүүс ҮХЦ-д хандан дүгнэлт гаргуулахаар мэдээлэл гаргасныг би зөв гэж харж байгаа юм. Энд мэтгэлцээн үүсэж байна. Гэтэл зарим хүн улс төржиж байна гэж хараад байгаа. Үгүй юм.

ҮХНӨ дотор хэн нэр дэвшиж болохыг тодорхой заасан. "50 нас хүрсэн, таваас доошгүй жил эх орондоо амьдарсан, Монгол улсын уугуул иргэн байна" гэсэн. Харин, Монгол улсын Ерөнхийлөгчийн тухай хуульд "Өр төлбөргүй, сэтгэцийн эмгэггүй, авлига, албан тушаалын гэмт хэрэгт холбогдож байгаагүй хүнийг зургаан жилийн хугацаатай, зөвхөн нэг удаа сонгоно" гэж заасан. 

Иймд ер нь бол маргаж, мэтгэлцээд байх шаардлагагүй юм. Өмнө нь улирсантайгаа нийлээд найман жил сонгогдож болдог байсан бол ҮХНӨ-өөр зургаан жилээр, зөвхөн нэг удаа сонгогдоно гэсэн байгаа. Одоогийн Ерөнхийлөгч хэрэв нэр дэвшээд, дахин сонгогдлоо гэж бодвол нийт арван жил ажиллах болоод байна шүү дээ. Зөвхөн гэдэг бол ганц удаа гэсэн үг. Өөрөөр хэлбэл, Монгол улсын Ерөнхийлөгчөөр ганцхан удаа сонгогдож болно. Өмнө нь Ерөнхийлөгч байсан хүмүүс дахин сонгогдвол хоёр дахь, гурав дахь болох гээд байна шүү дээ. ҮХНӨ бол Ерөнхийлөгчөөр ажиллаж байсан, ажиллаж байгаа таван хүнийг хязгаарласан.

-Энэ нь хүний сонгох, сонгогдох эрхийг зөрчиж байна гэж зарим хуульчид үзэж байна? 

-Тийм биш юм аа. Тухайн намаас хэн ч нэр дэвшиж болно шүү дээ. Яагаад заавал одоо байгаа хүнийг онцолж яриад байгаа юм бэ. Монголчууд их улс төрждөг болж. Сонгосон хүнээ байнга муулна. Сонгогдсоны дараа хашгирах биш, явцад нь оролцох хэрэгтэй. 

Ерөнхийлөгчийн тухай хууль 2020 оны тавдугаар сарын 25-наас мөрдөгдөж эхэлсэн. Монгол орон даяар бүрнээ дагаж мөрдөнө гэж заасан. Энэ нь хүн бүр хэлбэрэлтгүй дагаж мөрдөнө гэсэн үг. Тэгэхээр ҮХЦ энэ баасан гарагт хуулийн дагуу шийдвэр гаргана гэдэгт итгэлтэй байна. 

---