Энэ сарын 13-ны өдрийн байдлаар коронавирусийн эсрэг эхний тунгийн вакцин хийлгэсэн 2804 хүн халдвар аваад байна. Нийт вакцин хийлгэсэн 617 мянган иргэдийн 0.37 хувийг эзэлж байна.

Вакцин хийлгэсний дараа халдвар авсан иргэдийг судлахад эхний тунгаа хийлгээд 21 хоногийн дотор 74 хувь нь халдвар авсан байгаа юм. Тэгэхээр вакцин хийлгэсэн ч таныг 100 хувь хамгаалахгүй учраас халдвар хамгааллын дэглэмээ баримтлах хэрэгтэй.

Түүнчлэн вакцины эхний тунгаа хийлгэсэн гурван иргэн өнөөдрийн байдлаар нас бараад байна. Хоёр иргэний хувьд синофарм вакцин, нэг нь файзер вакцин тариулсны дараа 7-10 хоногийн дотор нас баржээ.

Гэхдээ вакцин хийлгээд нас барсан тохиолдол манай улсад бүртгэгдээгүй. Халдвар аваад суурь өвчин нь сэдэрсний улмаас нас барсан гэдгийг ХӨСҮТ-ийн захирал Л.Баттөр дурдлаа.

Түүнчлэн өнөөдрийн байдлаар халдвар авсан таван иргэн гэртээ нас бараад байгааг дурдав. Эдгээр иргэдийн хувьд шинжилгээний хариундаа итгэхгүй, эмнэлгийн байгууллагад хожуу хандсаны улмаас нас барсан гэлээ.

---